ANGALIA, PIGA HESABU…KAPOMBE DHIDI YA YAYA TOURE…

Na Saleh Ally

Taifa Stars imefungwa mabao 4-2 na wageni wake Ivory Coast katika mechi ambayo imekuwa ni kama msumari katika mioyo ya Watanzania wapenda soka ambao tayari walikuwa na matumaini makubwa.

Matumaini makubwa ya mashabiki wa soka yalikuwa ni kuiona Stars ikivuka na kukwea pipa la kucheza Kombe la Dunia mwakani kule Brazil.

Tuliamini inawezekana kwa kuwa timu yetu ilionyesha inaweza, ilicheza vizuri na kufanikiwa kupata ushindi kama mechi ngumu zikiwemo zile zinazoihusisha Morocco ambayo ni moja ya timu kubwa barani Afrika, ikalala kwa mabao 3-1.

Achana na wale Watanzania ‘feki’ ambao wameshaanza kuibeza Stars kisa imefungwa na Ivory Coast! Lakini walishangilia pamoja nasi wakati Stars hiyohiyo ilipoinyoa Morocco kwa mabao 3-1. Nawaita wanafiki.

Ninapolenga, pamoja na mchezo mzima, nilikuwa naangalia vita ya wachezaji uwanjani. Naweza kusema wachezaji wa Tanzania hata kama walifanya makosa lakini walijitahidi kwa kiasi kikubwa.

Kuna mambo kadhaa ya kuangalia, lakini mfano wangu mzuri wakati nikiwa nyuma ya goli la Ivory Coast na baadaye Taifa Stars, niliona beki kinda wa Stars, Shomari Kapombe akifanya kazi ya kumzuia Yaya Toure.

Inawezekana mmesahau, Kapombe ni beki wa Simba, Yaya anatokea Manchester City ya England. Hapa ndipo sinema inaanzia, taratibu utagundua ninachotaka kuelezea. Kidogo narudi kwenye ‘trela’ kabla ‘picha’ kuanza.

Mwaka 2009, nilikuwa nchini Ivory Coast kwa siku 20, moja ya sehemu nilizotembelea ni ‘akademi’ ya Asec Mimosa ya jijini Abidjan. Nikiwa pale niligundua mfumo mzuri sana wa kukuza wachezaji ambao hauna tofauti na ule wa Ulaya.

Wafaransa lukuki wameajiliwa pale, wanalipwa mamilioni ya fedha kuhakikisha mambo yanakwenda vizuri na mmoja wao ni mke wa aliyekuwa kocha wa Simba, Patrick Liewig.

Kati ya wachezaji waliopitia Asec Mimosa ni Yaya na kaka yake Kolo Toure na baada ya hapo wakaanza safari ya kwenda nchini nyingine kama Ufaransa na kwingine. Sasa ‘picha’ linaanza.

Makuzi:

Toure amekulia maisha ya soka hasa, hana tofauti na wachezaji wa Ulaya, lakini makuzi ya Kapombe kila kitu kinaonekana kinaendana na kubahatisha kwa kuwa amekulia kwenye ‘akademi’ zetu za kuunga.

Ndani ya Mimosa, viwanja bora vinne kwa ajili ya vijana, mmoja mkubwa kwa ajili ya timu ya wakubwa, sehemu ya madarasa, sehemu ya kulala wachezaji na hoteli kubwa ya kisasa inayomilikiwa na timu hiyo.

Lakini hakuna ubishi Kapombe amecheza katika viwanja vigumu, vyenye mabonde na kwa kifupi ni katika hali ngumu sana.

Ukiangalia hata mpangilio wa mlo, pale Mimosa kila kitu ni kwa mpangilio na wakati mwingine wachezaji waandikiwa kwenye karatasi. Tafakari mwenyewe kuhusiana na Kapombe.

Walimu:

Waaivoriani, wameajiri Wafaransa kwa ajili ya kuwakuzia watoto wao kisoka. Mmoja wao ni Yaya, maana yake mambo yanakwenda kitaalamu zaidi.

Lakini angalia Kapombe amefundishwa na walimu wetu ambao huwezi pia kuwalaumu kwa kuwa hakuna mipango madhubuti ya kuwaendeleza zaidi ili wasaidie vijana wetu. Badala yake nao wamekuwa wakitumia vipaji vyao tu.

Hata maslahi, Wafaransa wa pale Mimosa wanalipwa zaidi ya dola 20,000 kwa mwezi, hivyo wanaifanya kazi yao kwa ufasaha na kujituma kuhakikisha wanazalisha. Lakini hapa Tanzania makocha walioanza kumkuza Kapombe, huenda walikuwa wakifanya kazi kwa kujitolea au kwa mshahara usiozidi Sh 200,000.

Ulaya:

Mwaka 2001 hadi 2003, Toure alikuwa akiichezea Beveren ya Ubeligiji, timu hiyo wamepita wachezaji kama Emmanuel Eboue, Romaric, Arthur Boka, Gervino na wengine wengi. Halafu 2003-05 akahamia FC Metalurh Donetsk ya Ukraine.

Halafu akaenda Olympiacos ya Ugiriki, halafu Monaco na baadaye Barcelona ya Hispania kabla ya kutua Manchester City ambayo amekuwa msaada mkubwa kuisaidia kutwaa ubingwa. Sasa Yaya ni mchezaji bora Afrika mara mbili mfululizo.

Lakini ukitaka kuelezea kuhusiana na Kapombe, lazima utasema alianza kuchipukia katika ‘akademi’ fulani, akatua Polisi Morogoro na sasa yuko Simba.

Angalia nyuma makuzi yake ya soka, lakini angalia alikopita hadi kufikia alipo na kazi aliyoifanya kupambana na Yaya kila alipowavuka viungo, yeye ndiye alikatiza na kupambana naye.

Ujuzi: 

Nimeangalia, katika zaidi ya mara 12 walizokutana Kapombe na Yaya, mara nne beki huyo alifanikiwa kuudokoa mpira na mara moja alimsumbua hadi Amri Kiemba alipofika na kuuchukua mpira.

Lakini wakati mwingine ilionekana ni tatizo kubwa kwa Kapombe kwa kuwa Yaya alionyesha kuwa na vitu vingi vya ujuzi, mfano aufiche vipi mpira, au akae nao vipi mtu  akiwa kulia, kushoto au nyuma yake.

Yote hiyo ilikuwa ni dalili ya mchezaji anayetumia juhudi na kipaji chake na mwingine anayetumia hivyo lakini ana nyongeza ya viwili ambavyo ni kipaji na mafunzo bora.

Bado Kapombe ana sifa za kuzidiwa na Yaya, achana na kwamba kuna nyongeza ya majaaliwa ya Mwenyezi Mungu kuhusiana na umbo, lakini hakuna ubishi kwamba Yaya amepata vingi vya mpira tokea anakua hadi sasa amefikisha miaka 30.

Kwa kuwa ni timu za taifa, naweza nisuruke na kugusa kuhusiana na mishahara yao kama sehemu ya hamasa na uwezo wa kucheza soka.

Kwamba Kapombe analipwa kiasi gani Simba na Yaya anachukua kiasi kipi Manchester City, lakini hata yule anaizomea Stars kufungwa na Ivory Coast, basi angalau atafakari hayo machache na kujua kuwa wachezaji wetu walifanya kazi kiasi gani.

Makosa unayaona, sasa tufanye nini na vizuri kabisa tukaanza kushauri badala kupoteza muda mwingine ‘tukiuza chai’ kwa kuwalaumu wachezaji wetu. Kwangu bado nawaona mashujaa waliopambana kwa ajili ya taifa lao na mfano huu wa Kapombe na Yaya, kila mmoja akipambana kwa ajili ya taifa lake, utaweza kukusaidia kutafakari.