MAKALA: BRANDTS ATANGAZA KUONGEZA ADHABU KWA WATOVU WA NIDHAMU YANGA, AZUNGUMZIA SUALA LA UZINZI

Na Saleh Ally

Msimu uliopita, Yanga walikuwa ni timu iliyofanya mabadiliko makubwa kuhusiana na suala la nidhamu, lengo lilikuwa ni kujenga kikosi imara chenye ushirikiano wa karibu zaidi.

Wakafanikiwa, maana kutoka nafasi ya tatu msimu mmoja hadi kuwa mabingwa wa Tanzania Bara, tena wakifanikiwa kutwaa taji huku wakiwa na mechi mkononi, maana yake walimaliza ligi wakiwa bora zaidi.

Si kwa kuchukua kombe tu, hata kwa takwimu, Yanga ndiyo walikuwa na kikosi bora kwani pamoja na kufunga mabao mengi zaidi kuliko timu nyingine kati ya zilizoshiriki ligi, wao ndiyo waliofungwa mabao machache zaidi na wakabeba rundo kubwa zaidi la pointi.

Kocha Mkuu, Ernie Brandts, ambaye ni mahiri kwa kuwa na vikosi vinavyobeba mataji, anataka zaidi ya walipofikia kwa kuwa msimu ujao Yanga itakuwa na kibarua kigumu cha michuano ya kimataifa.

Yanga watashiriki Ligi ya Mabingwa Afrika, na Brandts anajua lazima kuwe na mabadiliko makubwa na ikiwezekana, anasema atalazimika kuwa mkali zaidi.

Pamoja na mambo yote, Brandts anaelekeza ukali wake zaidi katika nidhamu, anaamini nidhamu ni muhimu zaidi kwake kwa kuwa imechangia kuleta mabadiliko makubwa.

Msimu uliopita, baadhi ya wachezaji wakiwemo Simon Msuva, David Luhende na Athumani Idd ‘Chuji’ walikumbana na adhabu ya kukatwa fedha zao za mshahara kutokana na kukutwa na kibano cha utovu wa nidhamu.

Championi: Labda kipi kitaongozeka ili kuboresha nidhamu?

Brandts:  Kuna mambo mengi, lakini suala la kuwahi mazoezini au kwenda na muda ni muhimu zaidi.

Championi: Kivipi?

Brandts: Mfano msimu uliopita niliwaondoa wachezaji katika kikosi kwa kuwa walichelewa, tena ni wachezaji wakongwe. Lakini kuna waliokatwa fedha zao.

Championi: Unafikiri hiyo inatosha au kutakuwa na mabadiliko?

Brandts: Ndiyo, kutakuwa na mabadiliko. Kwani adhabu ya makato ya fedha itakuwa kubwa zaidi. Kwanza hata suala la kusema mchezaji anaumwa halafu anabaki nyumbani, halitakuwa na ruhusa.

Championi: Kama kocha, lazima ukumbuke wachezaji nao ni binadamu, wanaweza kuugua. Au hilo ni kosa?

 Brandts: Si kosa, ila kuna utaratibu wa kufuata, suala la mchezaji kuumwa halafu anatuma ujumbe mfupi na kulala nyumbani haliwezi kuwa sawa. Sasa utaratibu lazima ufuatwe, mchezaji lazima aje  mazoezini, daktari wa timu atampima na kujua anaendeleaje na mwisho ataamua apumzike au la.

Championi: Vipi kuhusu kuhakikisha wachezaji wanafuata maadili hata nje ya uwanja?

 Brandts: Mimi nataka wachezaji wanaojitambua, siyo ninaowachunga, maana yake hata wakiwa nyumbani wajue wanachotakiwa kufanya kama vile kupumzika mapema, ikiwezekana kuepuka kutoka na kwenda kwenye klabu za usiku.

Championi: Lakini wachezaji wanaweza kwenda kujipumzisha kidogo na kunywa bia kidogo, je hilo ina tatizo?

Brandts: Inawezekana, huwezi kuwachunga, lakini mchezaji akinywa lazima ajue hatakiwi kupitiliza hadi kuonekana amelewa, pia lazima ajue ni wakati gani wa kunywa, mfano siku tatu kabla ya mechi. Tatizo lingine ni wanawake.

Championi: Sijaelewa, unamaanisha timu ya wanawake?

Brandts: Hapana, yaani suala la kuwa na wanawake kwao si zuri, wachezaji wengi wameshuka kiwango kutokana na suala hilo. Najua kwa utamaduni wa Afrika naweza kuonekana nakosea, lakini uzinzi ni adui mkubwa wa michezo. Katika soka, ukipenda suala hilo ujue hutadumu na mafanikio yatakuwa duni.

Championi: Lakini hutaweza kujua wachezaji wako kama wana tabia hizo au la kwa kuwa suala hilo ni siri.

 Brandts: Ndiyo maana mwanzo nilisema sitaki kuwa na watu ambao nitawachunga, wala sitaki kujua kama wanafanya hivyo au la. Lakini lazima wajue kwamba si sahihi kufanya hivyo. Anayefanya hivyo anashusha kiwango chake na mwisho anaimaliza timu.

Championi:  Unafikiri hayo yakifanyika, basi mnaweza kufanya vizuri katika Ligi ya Mabingwa Afrika?

Brandts:  Hayo ni sehemu tu, lakini Ligi ya Mabingwa Afrika si mchezo kwa kuwa nilishiriki nikiwa na APR na tukatolewa kwa fitina na Watunisia wa Etoile du Sahel.

Championi: Unafikiri nini kingine kitawasaidia?

Brandts: Pamoja na maandalizi mazuri, bado tunatakiwa kucheza soka la uhakika, kupunguza makosa kwa kuwa katika michuano hiyo mambo ni tofauti sana na ligi ya hapa nyumbani.

 Brandts: Tofauti yake ni ipi?

 Championi: Pamoja na ubora wa ligi yenyewe kwa kuwa inakutanisha mabingwa wa kila nchi, suala la umakini pia ni nguzo, kupunguza makosa pia ni muhimu sana. Unaweza ukafanya makosa sita katika Ligi Kuu Tanzania Bara na bado kusiwe na madhara, lakini katika Ligi ya Mabingwa kila kosa, ukajikuta umefungwa.

Championi: Shukurani kwa ushirikiano, nakutakia safari njema kurejea Uholanzi kwa mapumziko.