MASHABIKI YANGA WALISHAMBULIA BASI LA COASTAL, MMOJA AJERUHIWA, BIN SLUM ANG'AKA

Mchezaji wa Coastal Union, Juma Hamad amepata majeraha katika sehemu tofauti za mwili baada ya kushambuliwa na mashabiki wanaodaiwa wa Yanga, juzi katika Uwanja wa Taifa jijini Dar es Salaam.

 

BASI LA COASTAL UNION LILILOVUNJWA VIOO

Tukio hilo lilitokea muda mchache baada ya mechi yao dhidi ya Yanga kumalizika wakijiandaa kutoka uwanjani hapo kwa ajili ya kwenda hotelini.

Mkurugenzi wa Ufundi wa Coastal, Mohammed Bin Slum amesema Juma amaumia baada ya kukatwa na vioo vya basi lao ambalo lilishambuliwa na mashabiki wa Yanga.

“Wametushambulia na wamesema wazi wanalipa kisasi kwa kwa kuwa msimu uliopita Yanga walishambuliwa pale Kabuku. Wanapaswa kuelewa mashabiki wetu wako Tanga mjini wala si Kabuku.

“Lakini ajabu zaidi, Yanga walishambuliwa walipokuja Tanga na kutunga 2-0, sisi tukaja Dar na kucheza nao, tukatoka sare ya bao 1-1. Sasa mbona hawakutushambulia kama kweli ni kulipa kisa.

“Inaonyesha wazi hawakuridhika na matokeo, ile penalti imewauma ndiyo maana wamefanya vile. Hakika si kitu kizuri ingawa tunashukuru mchezaji anaendelea vizuri,” alisema Bin Slum.

Upande wa Kocha Mkuu wa Coastal, Hemed Morocco amelaani kitendo hicho na kusema hakikuwa cha kiungwana na Yanga wanapaswa kukubali matokeo.