FA WALIKATAA GUARDIOLA KUWA BOSI WA ENGLAND

IMEFAHAMIKA kuwa Chama cha Soka cha England (FA) kilikataa uamuzi wa kumpa nafasi Pep Guardiola kuwa kocha wa timu ya taifa ya England, mwaka jana, badala yake nafasi hiyo akapewa Roy Hodgson.

Taarifa za ndani ya FA zimeeleza kuwa kutokana na mafanikio aliyokuwa ameyapata Guardiola, 42, alipokuwa akiifundisha Barcelona ilionekana anaweza kupata nafasi hiyo, lakini mwenyekiti wa zamani wa FA, David Bernstein alipinga na nafasi hiyo akapewa mzalendo kwa ajili ya kukuza vipaji vya Uingereza.

Inaelezwa kuwa hatua za awali zilikuwa zimeanza kufanywa kwa ajili ya kuwasiliana na kocha huyo juu ya nafasi hiyo, lakini baadaye zoezi likasitishwa na ndipo, Guardiola akatangaza kuwa atainoa Bayern Munich kuanzia msimu wa 2013-14.

Hodgson, 66, aliteuliwa kuwa kocha wa England Mei Mosi, mwaka jana na anaitumikia nafasi hiyo mpaka sasa.