MANJI AKUTANA NA WACHEZAJI YANGA KIMYAKIMYA USIKU HUU

MANJI ALIPOKUWA AKIZUNGUMZA NA WACHEZAJI WA YANGA MSIMU ULIOPITA, LEO AMEKUTANA NA KIKOSI HICHO TENA KWENYE HOTELI YA SERENA JIJINI DAR

Mwenyekiti wa Yanga, Yusuf Manji amekutana na wachezaji wa kikosi cha Yanga usiku huu.

Manji amekutana na wachezaji hao pamoja na benchi la ufundi ambalo limeongozwa na Kocha Mkuu, Ernie Brandts.

Mkutano huo wa kimyakimya ambao waandishi wa habari hawakutakiwa kuhudhuria umefanyika kwenye hoteli ya Serena jijini Dar es Salaam.

Katika mkutano huo, Manji amezungumza mambo mbalimbali na wachezaji hao ikiwa ni pamoja na suala la kupoteza mchezo dhidi ya Azam FC.

Yanga iliyocheza vizuri katika mechi hiyo, ilipoteza kwa kuchapwa mabao 3-2.

“Lengo la mwenyekiti lilikuwa ni kuhakikisha tunaangalia wapi tumejikwaa na baada ya hapo tunaendelea mbele.

“Kikubwa amesisitiza kuangalia zaidi ushirikiano na kwamba sisi ni mabingwa hivyo lazima tupambane bila ya kujali timu zinatupania kupita kiasi,” alisema mtoa habari.

Wachezaji takribani wote wa Yanga walihudhuria mkutano huo na baadaye walipata chakula cha usiku pamoja.