SIMBA YATANGAZA KUGUNDUA MPANGO WA KUWAHUJUMU, YAWATUHUMU YANGA

Klabu ya Simba imesema imeshtukia hujuma na fujo zinazoandaliwa na watanai wao wa jadi Yanga wakati timu yao ikivaana na Mbeya City katika mechi ya Ligi Kuu Tanzania Bara.

Akizungumza jijini Dar es Salaam Ofisa Habari wa timu hiyo, Ezekiel Kamwaga alisema kuwa wamepata taarifa za mashabiki wa Yanga kupanga kuvaa jezi za Simba zenye rangi ya nyekundu na nyeupe kwa ajili ya kulipa kisasi kwa Mbeya City.

Kamwaga, ameliomba Shirikisho la Soka Tanzania (TFF) kwa ajili ya kushirikiana na jeshi la polisi kulinda usalama kwenye Uwanja wa Taifa jijini Dar es Salaam.

“Tumepata taarifa za watani wetu wa jadi Yanga kupanga kulipa kisasi cha kuwafanyia fujo wapinzani wetu Mbeya katika mechi ya kesho.

“Wamepanga kuvaa jezi zetu zenye rangi nyekundu na nyeupe kama njia ya kuonekana mashabiki wa Simba wakati siyo, tunaiomba TFF kwa kushirikiana na jeshi la polisi kumchukulia hatua kali shabiki yeyote wa Simba atakayefanya fujo ili iwe fundisho kwa wengine,” alisema Kamwaga.

Yanga katika mechi yao dhidi ya Mbeya City walifanyiwa fujo mbalimbali ikiwemo basi lao kuvunjwa vioo wengine wakinusurika kupigwa.