LIGI KUU BARA, MKWAKWANI BADO TIMU ‘ZINAISHI’ KAMA ZA MCHANGANI

KOCHA WA SIMBA, ABDALLAH KIBADENI AKITOA NASAHA KWA WACHEZAJI WAKE WAKATI WA MAPUMZIKO DHIDI YA COASTAL UNION, WALISHINDWA KUINGIA VYUMBANI KUTOKANA UCHAFU.

Unaweza kudhani ni miujiza, lakini ndiyo hali halisi na huenda mambo huwa magumu zaidi zinapokwenda timu ambazo hazina majina makubwa kucheza kwenye Uwanja wa Mkwakwani mjini Tanga.

Uwanja ni mchafu umepitiliza, hasa katika suala la vyoo na vyumba vya kubadilishia nguo.

Simba walilazimika kukaa nje wakati wa mapumziko wakati wa mechi ya Ligi Kuu Bara iliyomalizika kwa sare ya bila kufungana, Jumatano.

Unaweza kusema Simba walihofia ushirikina, lakini ukibahatika kuingia kwenye vyumba au vyoo, ni hatari na vigumu kama kuamini uwanja huo upo katika karne tunayoishi.

Swali, vipi mechi zinachezwa, uwanja unaingiza fedha na hakuna marekebisho yoyote yanayofanyika.

Lakini timu za Tanga ambazo ni Coastal Union na Mgambo Shooting, vipi wanaliona suala hilo ni kama la kawaida tu.

Kuna sababu ya kufanya mabadiliko, au uwanja huo ukubali ukatwe fedha kila mechi na zitumike kutengeneza sehemu muhimu kama vyumba na vyoo.

Hii ni aibu, Tanga ni mjini mkubwa wenye watu wengi wanaopenda michezo, walilie hilo na kuhakikisha linarekebishika.

Michezo bila uhakika wa afya ni tatizo, kurekebisha vyumba vya kubadilishia nguo na vyoo, haiwezi kuwa mamilioni. Uongozi wa Mkwakwani usione raha kupokea tu fedha za makato ya mapato ya milangoni, badala yake uangalie na huduma inayotolewa.