BERKO, KAZE, MWOMBEKI WAPEWA CHANSI ZENJI

Nyota wa Simba ambao hakupata nafasi ya kucheza katika mchezo wa kirafiki wa Nani Mtani Jembe dhidi ya Yanga sasa wataonyesha makali yao kwenye michuano ya Mapinduzi visiwani Zanzibar.

 

Kocha Zdravko Logarusic amesema atatumia michuano hiyo kuwaona wachezaji wake wengine na si kukimbilia kutwaa Kombe la Mapinduzi.

Wachezaji ambao watapata nafasi ya kumuonyesha walichonacho kocha huyo raia wa Croatia ni pamoja na kipa Yaw Berko, beki wa kati Gilbert Kaze na mshambuliaji Betram Mwombeki.

Akizungumza kutoka Croatia, Logarusic alisema hakupata nafasi ya kuwaona wachezaji hao katika mechi dhidi ya Yanga ambayo walishinda kwa mabao 3-1, hivyo michuano hiyo itakuwa nafasi kwao.

“Nitawaachia wacheze, najua timu ataanza nayo (Selemani) Matola ambaye ni kocha mkuu. Lakini anajua tunataka nini.

“Nitachelewa mechi moja, baada ya hapo nitaungana nao na ningependa kuona wanacheza. Suala la kutwaa kombe si namba moja, badala yake nataka kujenga timu kwa ajili ya ligi kuu,” alisema Logarusic.

Berko alishindwa kuanza katika mechi dhidi ya Yanga kwa kuwa Ivo Mapunda alipewa nafasi, Kaze alichelewa kurejea kutoka Burundi hivyo hakukaa hata katika benchi na Mwombeki alikosa nafasi baada ya kushindwa kumvutia kocha huyo mazoezini.