MAKALA: BOSI ALIYEMPA MESSI GARI ALIKUWA SIMBA TOKEA KIBADENI AKIWA MCHEZAJI

AL RAWAHI (WA PILI KULIA) AKIWA NA TALIB HILAL NA MALKIA WA NYUKI WAKIMSIKILIZA KOCHA WA ZAMANI WA SIMBA, PATRICK LIEWIG

Na Saleh Ally

Jumatano iliyopita, Championi liliandika kuhusiana na mwanachama mmoja wa Simba aliyeamua kumpa gari kiungo kinda wa Simba, Ramadhani Singano ‘Messi’.

Juhudi za SALEHJEMBE hili zilifanikiwa kupata jina la mwanachama huyo kuwa ni Musleh Al Rawahi aliyeonyesha upendo wa aina yake kwa mchezaji huyo na klabu ya Simba.

Waliosimama kutoka kushoto; Khamis Kisukari mwenye bendera (marehemu), Aloo Mwitu Khamis, Jumanne Hassan ‘Masimenti’ (marehemu), Mohammed Kajole (marehemu), Abdallah Mwinyimkuu (marehemu), Daudi Salum ‘Bruce Lee’, Meneja wa timu Abdulrahman Muchacho

Waliochuchumaa kutoka kushoto; Shaaban Baraza, Athumani Juma (marehemu), Alu Ali, Omari Mahadhi (marehemu), Martin Kikwa (marehemu), Abdallah Kibadeni, Abasi Dilunga, Mohammed Bakari ‘Tall’.

Suala la Al Rawahi kutoa gari aina ya Suzuki Carry kwa Messi lilipata mjadala mkubwa na wengi hawakuamini kama kuna mwanachama anaweza kufanya hivyo tu.

Messi si mchezaji wa kwanza wa Simba au Yanga kuzawadiwa gari, lakini kawaida wanachama au uongozi wa klabu hizo kubwa huwazawadia wachezaji wake magari wanapokuwa wako katika harakati za usajili.

Ili kumvuta mchezaji, anapewa gari pamoja na fedha na suala hilo limetokea mara nyingi sana mfano mzuri ukiwa ni ule wakati Mrisho Ngassa akitokea Azam FC kwenda Simba, Kelvin Yondani akitokea Yanga kwenda Simba. 

 

AL RAWAHI (KUSHOTO), AKIMKABIDHI MALKIA WA NYUKI JEZI YA SIMBA

Tofauti ya Messi na gari alilopewa si kipindi ambacho kinajumuisha usajili, ni moyo tu wa kujitolea na mapenzi kwa klabu yake aliouonyesha Al Rawahi!

Al Rawahi ni kati ya wajumbe wa kamati ya usajili ya Simba hadi sasa na aliwahi kuwa kwenye kamati tofauti hapo kabla.

Wakati Simba chini ya Kassim Dewji ilipoing’oa Zamalek mwaka 2003, Al Rawahi aliongoza kambi ya Oman kwa siku 10 kabla ya timu hiyo kushuka Misri na kuivua ubingwa timu hiyo kigogo.

Juhudi za Championi kutaka kujua hasa Al Rawahi ni nani, zimevumbua mambo kadhaa ambayo huenda hayakujulikana hapo awali na yanaweza kuwa sababu ya kiongozi huyo kuamua kutoa gari hilo kwa Messi.

Al Rawahi si shabiki wa Simba leo au jana, amekuwa akiipenda timu hiyo akiwa kinda na picha yake akiwa na kikosi cha Simba mwaka 1977 ndiyo inathibitisha hayo yote.

Kikosi hicho cha Simba ni kati ya vile bora kabisa vilivyowahi kutokea katika historia ya klabu hiyo na Al Rawahi akiwa na umri wa miaka sita pamoja na kaka Murshid (7) yake wako katika picha hiyo ya kikosi cha Simba.

Kikosi hicho kilikuwa na wakali kama Aloo Mwitu, Jumanne Hassan ‘Masimenti’, Mohammed Kajole, Abdallah Mwinyimkuu na Daud Salim ‘Bruce Lee’.

Wengine waliokuwa katika kikosi hicho ni Martin Kikwa, Mohammed Bakari ‘Tall’, Abass Dilunga, Aluu Ali, Shabani Baraza na Abdallah Kibadeni.

Baba yake Saleh Ruwahi alikuwa ndiye mfadhili wa Simba enzi hizo wakati yeye alikuwa akivutiwa na wachezaji kama Kibadeni, lakini leo anaendelea kuwa mwanachama wa Simba na anatoa msaada kwa Messi ambaye ni sawa na mwanaye.

Huenda ukawa ni mfano mzuri wa mwanachama na shabiki wa Simba wa aina yake aliyeonyesha mapenzi tokea akiwa hajiwezi kifedha hadi leo.

Al Rawahi hakuweza kupatikana na ilielezwa alikuwa nchini Oman, lakini rafiki yake wa karibu alieleza kwamba kati ya watu Simba damu, mmoja wapo ni yeye.

“Unajua wakati baba yao alipokuwa mfadhili, walikuwa wanapelekwa kambini kila siku ya mechi. Wanashinda kule na wachezaji hadi wakati wa kwenda kwenye mechi.

“Jiulize mtu kama huyo atakuwa na mapenzi na Simba kwa kiasi gani, maana tokea enzi za Kibadeni wanacheza, yeye alikuwa anakwenda kambini na baadaye uwanjani.

“Hivyo mapenzi ya Simba si kitu cha kubahatisha kwake. Na hili suala la Messi kwa kuwa mmelijua, lakini yeye amesaidia wachezaji wengi sana. Lakini si mtu mwenye majivuno na maneno mengi ndiyo maana amekuwa kimya,” alieleza rafiki yake huyo.