YANGA KWENDA ULAYA NA MKWASA

Yanga imemalizana na  Charles Boniface Mkwasa katika nafasi ya kocha msaidizi na ndiye ataongozana na timu hiyo kwenda kambini barani Ulaya.

Habari za uhakika kutoka ndani ya Yanga zimeeleza Mkwasa ataondoka na timu hiyo kwenda Ulaya itakapokwenda kuweka kambi.

“Yanga itaweka kambi barani Ulaya kujiandaa na Ligi Kuu Bara. Kwa kuwa haina kocha mkuu, Mkwasa ndiye ataongoza msafara.

“Unajua makocha wawili walikuwa wanapewa nafasi, (Juma) Mwambusi na Mkwasa lakini inaonekana kocha huyo mkongwe amepewa nafasi,” kilifafanua chanzo hicho.

Mkwasa amewahi kuichezea na kuifundisha Yanga kwa vipindi tofauti.

Juhudi za kumpata jana baada ya kupata taarifa hii ziligonga mwamba kwa kuwa simu yake ilikuwa inaita tu bila kupokelewa.

Lakini juzi alinukuliwa na vyombo mbalimbali vya habari akisema amefanya mazungumzo na Yanga na vingine vilisema walishamalizana.

Yanga imeamua kufanya mabadiliko katika benchi la ufundi baada ya kufungwa mabao 3-1 na Simba katika mechi ya kirafiki ya Nani Mtani Jembe.