COASTAL YATANGAZA KUTOMUONGEZEA MKATABA BOBAN, YAMKATA MSHAHARA

Uongozi wa Coastal Union umesema hautamuongeza mkataba mshambuliaji Haruna Moshi ‘Boban’ kutokana na kuwa na utovu wa nidhamu.  

Makamu Mwenyekiti wa Coastal, Steven Mnguto, alisema mpaka sasa mshambuliaji huyo hajaripoti kambini kuanza mazoezi na wenzake na hajatoa taarifa yoyote.

Alisema kwa tabia ambayo ameionyesha ni ngumu kumuongeza mkataba mshambuliaji huyo aliyebakiza miezi sita tu katika mkataba wake unaomalizika mwishoni mwa msimu huu. 

Aliongeza pia kutokana na kutojiunga na kikosi hicho mpaka sasa atakatwa mshahara wake wa mwezi huu kwa kuwa hajaufanyia kazi yoyote tokea alipotakiwa kujiunga na wenzake  Desemba, Mosi mwaka huu.

Aidha alisema adhabu hiyo itamkuta pia kiungo Jerry Santo ambaye ni raia wa Kenya kutokana na kutotoa sababu zozote za kuchelewa kujiunga na wenzake kambini.

“Ni bora tukapandisha vijana wetu wa U20 kwa kuwa tunajua watatusaidia na wana nidhamu ya hali ya juu kuliko hawa ambao ni wazoefu lakini wanatusumbua upande huo.

“Hatuwezi kumuongeza mkataba mtu ambaye tunaona kabisa nidhamu yake haituridhishi kama timu na hajatoa hata taarifa yoyote.  Wa nini mtu kama huyo?  Sisi tunaangalia maslahi ya timu ili ifanye vizuri,” alisema Mnguto.

Boban aliondolewa kwenye kikosi cha Simba ambacho alikuwa amekitumikia kwa muda mrefu kutokana na utovu wa nidhamu.