HODI RAGE, UMEWASIKIA TFF NA FIFA KUHUSU OKWI?

Hodi Rage, umewasikia Fifa na Okwi!

MAMBO yamekuwa yakienda hatua kwa hatua na inawezekana kabisa baada ya muda mfupi ujao ukweli wa kila kitu utakuwa hadharani kuhusiana na masuala ambayo nimekuwa nikizungumzia juu ya suala la mshambuliaji Emmanuel Okwi.

Hapa ni haki bin haki, halafu hakuna woga kwa kuwa kinachozungumzwa ni ukweli mtupu na aliye tayari anakaribishwa kwa ajili ya kujadili, waoga wa hoja mnaopenda kutoa vitisho hapa si sehemu yenu, mimi leo naibuka tena na kupiga hodi kwa Mwenyekiti wa Simba, Ismail Aden Rage.

Huenda Rage hakufanikiwa kusikia kuhusiana na suala la Okwi linavyoendelea, huenda amebanwa na majukumu mengi kwa kuwa natambua ni Mbunge (CCM) wa Jimbo la Tabora Mjini, huenda analazimika kufanya mambo mengi kwa wakati mmoja kulazimika kuyatimiza.

Pole sana Rage kutokana na majukumu hayo, sijui kama unayaweza au kuyashindwa majukumu hayo, siri yako moyoni lakini leo nataka kukukumbusha kuhusiana na suala la Emmanuel Okwi ambalo awali uliwahi kusema mimi ni kasuku, leo hii hali taratibu inakwenda inabadilika na huenda jina hilo lilikuwa sahihi kwako kama ambavyo nilifafanua.

Shirikisho la Soka Tanzania (TFF) limetangaza kuwa Okwi kwa sasa ni mali ya Yanga na anaruhusiwa kucheza michuano ya ndani na ile ya kimataifa na atakuwa dimbani kama akiwa fiti kuitumikia Yanga itakapokuwa ikitoana jasho na mabingwa wa Afrika, Al Ahly.

Je, umesikia au ulikuwa umebanwa na majukumu? Nilichokisema na wewe ukadai zilikuwa ni ndoto au uchunguzi mbovu, taratibu kinaanza kutimia, kwamba wakati Simba ikiwa imemuuza Okwi kwa dola 300,000 (Sh milioni 480) katika klabu ya Etoile du Sahel ya Tunisia ikiwa haijapata hata senti, Fifa imesema anaweza kukipiga Yanga.

Okwi yuko Yanga na Simba haijapata kitu! Nani anabisha, kati yako au wale waliokuunga mkono kwa kujali urafiki wako au kuwa wapambe tu lakini hawakuangalia hoja za msingi ambazo nilikuwa nazitoa kwako na wewe zikakuzidia ukaamua kuvurumisha lawama lukuki na vitisho ukijaribu kunizima, kitu ambacho hakitakuwa na msamaha kwa kuwa nitaendelea kusema ukweli hadi mwisho wa jambo hili, nasisitiza sitakaa kimya hadi ukweli uwe hadharani na kama utakuwa sahihi, basi nitakupongeza.

Hata kabla Simba haijalipwa fedha zake, leo Okwi tayari amecheza katika vikosi vya klabu tatu tofauti. Yaani Etoile ya Tunisia, SC Villa ya Uganda na sasa Yanga ya Tanzania na Simba haijapata hata senti. Wewe ndiye ulifanya biashara hiyo na hata Kamati ya Utendaji ya Simba ilisimama hadharani na kukukosoa kwamba hukufuata utaratibu au hukwenda kama mlivyokubaliana hadi ikatangaza kukusimamisha.

Kuna wakati nikakueleza kwamba Okwi sasa si mali ya Simba na unachotakiwa wewe ni kuweka nguvu kudai fedha za Simba, ukakana, ukang’aka na kusisitiza Okwi hatakiwi kucheza, hiyo haikuwa kazi yako, Okwi sasa kwa mujibu wa TFF ameidhinishwa kucheza Yanga. Mimi naendelea kuhoji kuhusiana na malipo ya Okwi.

Kingine ambacho kimenishangaza ni wewe kusema kwamba Etoile wameomba wasogezewe muda wa kulipa deni hadi Septemba mwaka huu na wameomba hivyo kwa Fifa na Simba imepata kopi. Sasa kama ni hivyo na wewe tayari ulisema hugombei, maana yake utawaachia Simba deni hilo?

Nilifikiri kama ungekuwa ‘smart’, basi ungejitahidi kuhakikisha Simba wanalipwa kabla ya wewe kuondoka. Ndiyo maana mara nyingi nimekuwa nikisisitiza Okwi aliuzwa ‘bure’ kwa kuwa Simba haikupata lolote licha ya kwamba siku chache kabla ya kumuuza, Simba ilikuwa imemsainisha Okwi mkataba mpya na kumpa dola 40,000. Sijui unakumbuka!  Maana nilikuona kwenye picha ukiwa umetabasamu na Okwi akiwa karibu yako.

Nafikiri huu ndiyo wakati mwafaka wa wewe wa kufunguka, waambie Wanasimba kwamba kama Okwi anacheza Yanga, fedha za malipo yake vipi? Na kama umekubali Septemba na wewe hutakuwepo vipi ufuatiliaji au umeamua kuliacha deni lisogee mbele ili wakati wa uchaguzi useme unataka kugombea ili ushughulikie fedha za Okwi?

SOURCE: CHAMPIONI