MAKALA: YANGA VS AL AHLY...YAANI BONGE LA MECHI

 Na Saleh Ally

APRILI 2, 2009, Yanga ilifungwa bao 1-0 na wageni wao, Al Ahly, katika mechi ya kwanza ya Ligi ya Mabingwa, mechi ambayo huenda Yanga walikuwa na nafasi kubwa ya kushinda lakini washambuliaji wake hawakuwa makini katika umaliziaji.

Wakenya, Boniface Ambani na Mike Barasa, walikuwa na nafasi ya kufunga zaidi ya mabao mawili, lakini nafasi nyingi zilipotelea miguuni mwao baada ya kupata pasi nzuri huku kila mtu akiamini walikuwa wanatikisa nyavu.

Yanga inashuka dimbani Machi Mosi au 2, kuwavaa tena Al Ahly ambao ni mabingwa wa Afrika, mechi inayotarajiwa kuwa nzuri kwa kuwa Yanga haina sababu kuwa na woga kwa Waarabu hao wa Misri, lakini lazima ikubali kuwa jamaa wanajua na wana uzoefu mkubwa na Ligi ya Mabingwa Afrika.

Kivutio katika mechi hiyo ni kutokana na mechi ya mwisho iliyozikutanisha timu hizo kwenye Uwanja wa Taifa jijini Dar es Salaam na mechi inayofuatia, kuna mambo kadhaa ya kujifunza.

Nyumbani:

Timu hizo katika ligi za nyumbani zinaonekana kutokuwa na tofauti sana ingawa Al Ahly inaonekana kusuasua zaidi ya Yanga. Kwani katika mechi tatu zilizopita, kikosi cha kocha Hans van Der Pluijm kimeshinda mbili dhidi ya Ashanti United (2-1), sare ya bila kufungana na Coastal Union halafu kikawapiga Mbeya City (1-0).

Kwa Al Ahly katika ligi ya Misri mechi hizo tatu, imepoteza moja, sare moja na kushinda moja. Ikiwa nyumbani iliishinda Ghaz El Mehalla kwa bao 1-0, ikabaki nyumbani na kulazimishwa sare ya bila kufungana dhidi ya Al Ittihad kabla ya kukiona cha moto juzi Jumamosi kwa kuchapwa 1-0 ugenini dhidi ya El Gounah.

Ukizungumzia kwa rekodi ya nyumbani, Yanga wanayo nzuri, lakini bado si kipimo cha mwisho cha ubora wa timu hizo zitakapokutana jijini Dar es Salaam, takribani wiki mbili tu zijazo.

Vikosi:

Kuna rekodi kwenye kikosi cha Yanga kilichokutana na Al Ahly na ambacho kitacheza nayo tena wiki mbili zijazo kwa kuwa kuna wachezaji walikuwepo Yanga tokea wakati huo na walicheza na sasa bado wapo.

Kipa Juma Kaseja, ndiye alikuwa langoni siku hiyo wakati Flavio Amado raia wa Angola alipofunga bao pekee la mechi baada ya kupokea pasi ya Mohamed Aboutrika. Lakini Kaseja aliondoka na kujiunga na Simba, kabla ya kurejea tena Yanga msimu huu.

Beki Nadir Haroub ‘Cannavaro’ alikuwepo tokea wakati huo, katikati alisimama na George Owino. Mrisho Ngassa pia alicheza dakika zote 90, bado yuko Yanga lakini aliondoka na kujiunga na Azam FC, Simba kabla ya kurejea Yanga msimu huu.

Mkongwe Athumani Idd ‘Chuji’, alicheza dakika zote 90, kocha Dusan Kondic akimpanga namba 11. Mchezaji wa tano ambaye anakutana na Al Ahly tena ni Jerry Tegete, siku hiyo alianzia benchi kabla ya kuingia kipindi cha pili kuchukua nafasi ya Boniface Ambani ambaye siku hiyo ‘alichemsha’.

Makocha:

Makocha kwa kila upande ni wageni, wakati Al Ahly inafundishwa na mzalendo Mohammed Yosseuf, kipindi hicho ilipokuja Dar es Salaam ilikuwa chini ya Kocha Mreno, Manuel Jose. Yanga ilikuwa na Mserbia, Dusan Kondic aliyekuwa akisaidiwa na Mcroatia Spaso Skolosovosk na Mserbia mwingine, Civojnov Serdan, sasa ina Mholanzi van Der Pluijm na mzalendo, Charles Boniface Mkwasa.

Rekodi dhidi yao:

Ukizungumzia rekodi ya timu hizo kukutana, tokea mwaka 1982 inaonyesha timu hizo zimekutana mara tatu. Wakati huo ikijulikana kama Klabu Bingwa Afrika, mara ya kwanza mwaka huo, Al Ahly iliishindilia Yanga mabao 5-0, waliporudiana jijini Dar es Salaam ikawa sare ya bao 1-1.

Mara ya pili ilikuwa mwaka Aprili 9, 1988, Yanga ilikomaa na kupata sare ya bila kufungana, Aprili 22 ilikuwa jijini Cairo ambako ilikutana na kipigo cha mabao 4-0.

Mechi ya tatu ni mwaka 2009, mechi ya kwanza Yanga ililala kwa mabao 3-0 nchini Cairo na iliporudi hapa jijini Dar es Salaam ikalala kwa bao 1-0 na mabingwa hao wa Afrika wakati huo wakasonga mbele na jumla ya mabao 4-0.

Wengine:

Al Ahly imekuwa mbabe wa timu za Tanzania na si Yanga pekee, rekodi zinaonyesha mwaka 1985, Simba ilijitutumua na kuichapa Al Ahly kwa mabao 2-1 kwenye Uwanja wa CCM Kirumba, Mwanza, hii ilikuwa ni michuano ya Kombe la Washindi wakati huo, lakini ilipofunga safari kwenda Cairo, ikafungwa mabao 2-0 na kutoka.

Mwaka 1993 katika Kombe la Washindi tena, Al Ahly ikakutana na timu nyingine ya Tanzania, ilikuwa zamu ya Pamba ya Mwanza na mechi ya kwanza Cairo, Pamba ikalala 5-0 mjini Mwanza, kwenye marudiano ikawa sare ya bila kufungana.

Timu nyingine iliyowahi kuingia katika anga za Al Ahly ambayo si Yanga au Simba ni Majimaji ya Songea, ilikuwa mwaka 1999. Mechi kwenye Uwanja wa Taifa ‘Shamba la Bibi’,  Majimaji ililala kwa mabao 3-0 halafu ikafungwa tena 2-0 jijini Cairo.