KATIBU MKUU TFF, AFUNGUKA NA KUFAFANUA SUALA LA OKWI

Sakata lililoshika hatamu katika kipindi kifupi cha nyuma ni kuhusu mshambuliaji wa Yanga, Emmanuel Okwi aliyedaiwa kuwa na usajili wa utata na kusababisha Shirikisho la Soka Tanzania (TFF) kumsimamisha mpaka lipate ufafanuzi kutoka Shirikisho la Soka la Kimataifa (Fifa).

Mchezaji huyo raia wa Uganda, alisajiliwa na Etoile du Sahel ya Tunisia akitokea Simba Januari, 2013 kwa mali kauli ya dola 300,000 (Sh milioni 480) ambazo hazijalipwa mpaka sasa, kisha akashindwana na timu hiyo akarejea kwenye timu yake ya awali, SC Villa ya Uganda kwa makubaliano maalum na baadaye akatua Yanga, usajili uliozua utata mkubwa nchini.

Pamoja na sarakasi zote hizo zilizotokea lakini wiki iliyopita tamko rasmi lilitolewa na TFF kwamba Okwi ni mchezaji halali wa Yanga baada ya kupokea ufafanuzi waliokuwa wakiuhitaji kutoka Fifa.

Pamoja na ruksa hiyo, bado kuna maswali yanayohitaji majibu ambapo Katibu Mkuu wa TFF, Selestine Mwesigwa, amefafanua kila kitu:

Villa ilipata vipi uhalali wa kumuuza Okwi wakati alikuwa akicheza hapo kwa makubaliano maalum?

“Okwi hakuwa kwa mkopo Villa wala kwa makubaliano mengine, bali alipokuwa na matatizo na Etoile ambayo yalifika Fifa ndiyo kuna jaji mmoja kutoka Fifa alitoa hukumu kwamba Okwi arudi Villa na ITC yake pia wakakabidhiwe Villa, kwa hiyo timu inapokuwa na ITC ya mchezaji, ndiyo inakuwa na mamlaka yote juu yake.”

Je, Yanga ilimsajili kama mchezaji huru?

“Okwi hakuwa mchezaji huru, alinunuliwa kutoka Villa, Villa walimuuza kwa vigezo vyote kwenda Yanga.”

Kanuni gani iliyoufanya mkataba wake Etoile kuvunjwa?

“Tulipolifikisha hili suala Fifa sisi tulitaka kujua tu kama Okwi ni halali kucheza Yanga ama la, hatukutaka ufafanuzi mrefu sana.

“Kikubwa ni kujua kama anaweza kucheza Yanga kutokana na usajili wake ulivyokuwa una maswali mengi kwa sababu Simba pia walitufuata na kutaka kujua nini kimetokea kwa Okwi mpaka katua Yanga, kwani hata wao pia walikuwa na kesi yao inayoendelea kule kuhusu mchezaji huyohuyo na inayohusu pesa za usajili wake.

“Kitu cha msingi ni kwamba Fifa wametuambia anaweza kucheza Yanga, kuhusiana na kanuni ipi ilitumika kuvunja mkataba wake na Etoile, hiyo siyo juu yetu.”

Mbona suala la Okwi kuruhusiwa Yanga limewahi kumalizika huko Fifa kuliko lile la madai ya Simba kwa Etoile?

“Ilikuwa lazima liishe kwa haraka kwa sababu suala la Yanga kuhusu Okwi lilikuwa linahitaji ufafanuzi tu na si vingine, kwa hiyo ilikuwa ni ishu ya mtu au ofisa mmoja wa Fifa kukusanya data za Okwi kuangalia mtiririko wake na kugundua uhalali uko wapi.

“Lakini kuhusu deni la Simba wanaloidai Etoile, ni lazima lichukue muda kidogo kwa sababu ni madeni yale na ile ni kesi inayoendelea, kuna utofauti kati ya kesi na ufafanuzi.”

Kwa hiyo suala la Okwi limekwisha kabisa au wanaendelea kulifuatilia taratibu?

“Kikubwa kilikuwa ni kuhusu uhalali wake wa kuitumikia Yanga, vyama pia vya nchi husika vilitakiwa kufahamu kuhusu hilo kwa kuwa ndivyo pia vinavyohusika kumpitisha mchezaji kuchezea timu aliyosajiliwa kwa kufuatilia taratibu zote, kwa hiyo majibu sasa yametolewa na yako wazi kuhusu Okwi.”

Katika hatua nyingine, Katibu Mkuu wa Yanga, Benno Njovu, amesema leseni ya kimataifa ya Okwi itakayomruhusu kucheza Ligi ya Mabingwa Afrika kuanzia mchezo dhidi ya Al Ahly, inatarajiwa kufika kati ya leo au kesho.

SOURCE: CHAMPIONI