KADUGUDA AFUNGUKA, AELEZA ALIVYOKATAA UKATIBU MKUU ALIOPEWA NA RAGE SIMBA MARA NNE

KADUGUDA

Kwa mara ya kwanza aliyekuwa Katibu Mkuu wa Simba, Mwina Kaduguda, amefunguka kuwa, mwenyekiti wa klabu hiyo, Ismail Aden Rage, aliwahi kumpa cheo cha ukatibu mara nne lakini akakataa.

Kaduguda aliyekuwa katibu wa Simba chini ya mwenyekiti Hassan Dalali, amesema Rage alikuwa akimhitaji awe katibu mara nne katika kipindi hiki cha karibuni lakini alikataa kwa kuhofia kuchafua CV aliyoitengeneza Simba miaka ya nyuma kutokana na tofauti baina ya viongozi waliopo sasa madarakani klabuni hapo.

Kaduguda alisema Rage alikuwa akiwasiliana naye mara kwa mara kuwa anamhitaji kwa ajili ya utendaji na kurekebisha baadhi ya mambo Simba lakini kwake akaona si sahihi kuwepo hapo kwa muda huu ambao Simba imekuwa ikikumbwa na migogoro ya mara kwa mara.

“Rage aliniita mara nne katika kipindi hiki cha nyuma walichokuwa wanatafuta katibu mkuu mpya na mara ya mwisho ilikuwa mwezi uliopita lakini nikagoma kwa kuwa niliona kabisa kufanya kazi na uongozi uliopo sasa ni kuchafua CV niliyokuwa nayo miaka ya nyuma Simba.

“Hata hivyo iweje aniite sasa wakati ni miaka minne imepita tangu akae madarakani na hajawahi hata kunipigia simu kuniomba ushauri?

“Mwenyekiti hapatani na wajumbe wake wa kamati ya utendaji, hii ni hatari na unaona ni jinsi gani ningeweza kwenda kuvunja heshima yangu niliyoijenga wakati nipo na Dalali.

“Najua Simba wananihitaji lakini naweza nikaenda baada ya uchaguzi huu kupita au nikagombea kwenye uchaguzi huu unaokuja kama nikitaka lakini vinginevyo naweza nikabaki kuwa mwanachama muadilifu wa Simba,” alisema Kaduguda. 

SOURCE: CHAMPIONI