NYOSSO ATAKA COASTAL WAMALIZE HASIRA KWA MBEYA CITY

NYOSSO (KUSHOTO) AKIMDHIBITI LUHENDE WA YANGA

Baada ya kufungwa na Ruvu Shooting bao 1-0, beki wa Coastal Union, Juma Nyosso, amesema kwa sasa hawaangalii  nyuma zaidi wanaendelea kujipanga kwa ajili ya mchezo ujao dhidi ya Mbeya City utakaochezwa Februari 22 kwenye Uwanja wa Mkwakwani, Tanga.

Coastal Union juzi ilipoteza mchezo wake wake wa nne msimu huu kwenye Uwanja wa Mabatini, Mlandizi.

Beki huyo wa zamani wa Simba, alisema mchezo ulikuwa mzuri na wenye ushindani, japo wapinzani wao waliwazidi dakika za mwisho na kufanikiwa kuwafunga kwa bao la dakika ya 85.

Nyosso alisema kwa sasa wanaangalia mbele jinsi gani ya kupata pointi tatu katika mchezo ujao dhidi ya Mbeya City.

“Kwa sasa tunaangalia ni vipi tunapata pointi tatu kwa mchezo wetu ujao. Mchezo uliopita umepita, kikubwa ni sisi kupata ushindi kwa mchezo wetu ujao,” alisema Nyosso.