MASHABIKI MBEYA WAMGOMBEA MESSI

Kiungo nyota wa Simba, Ramadhani Singano ‘Messi’, juzi Jumamosi alikuwa katika wakati mgumu baada ya kuvamiwa na mashabiki wa soka waliokuwa wakitaka kumkumbatia huku wengine wakitaka japo kumgusa, hali iliyomfanya apotezane na wachezaji wenzake baada ya mpira kumalizika.

Tukio hilo lilitokea baada ya kumalizika kwa mtanange wa kukata na shoka kati ya Simba na Mbeya City ambapo matokeo yalikuwa sare ya kufungana bao 1-1.

Katika tukio hilo, Championi Jumatatu lilishuhudia umati wa mashabiki hao ukimzingira mchezaji huyo, wengine wakimkumbatia na kumzuia kwenda kuungana na wenzake mpaka askari wa kutuliza ghasia walipomsaidia kwa kuwatawanya.

Baada ya mashabiki hao kutawanywa, ndipo Messi ikabidi aangaze walipoelekea wenzake na kuwafuata.