RAGE ASEMA SUALA LA OKWI BADO GUMU

Mwenyekiti wa Klabu ya Simba, Ismail Aden Rage, ameendelea kumkomalia mshambuliaji wa Yanga, Emmanuel Okwi kwa kudai kuwa, suala lake bado lina utata na mtego mkubwa ambao haujajulikana.

Okwi alikuwa katika wakati mgumu kufuatia leseni yake ya kucheza ligi kuu kufungiwa na Shirikisho la Soka Tanzania (TFF), wakisubiria ufafanuzi kutoka Fifa kuhusiana na kesi zinazomkabili, sasa ameruhusiwa kucheza.

Rage amesema kuwa, suala la Okwi siyo rahisi kama watu wanavyodhani kwani bado lina utata na kudai kuwa, kuna mtego mkubwa unaomkabili mchezaji huyo kuhusiana na kesi zake.

“Nani kasema kuwa Okwi ameruhusiwa kucheza? Mimi nilimsikiliza vizuri Mwesigwa (Selestine – katibu wa TFF) alivyokuwa akizungumza kuhusiana na suala hilo kwenye vyombo vya habari.

 “Ishu siyo rahisi kama watu wanavyofikiria, kunatakiwa umakini wa hali ya juu kuhusiana na jambo hilo, kwani alieleza kuwa kuna baadhi ya mambo hayajakamilika na wanaendelea kufuatilia.

“Kuna mtego mkubwa sana juu yake watu hawajui tu, inabidi kunapoandikwa habari hii kunatakiwa umakini wa hali ya juu isije ikawa tofauti, mimi siwezi kutoa ‘komenti’ juu ya suala hilo kwa sasa hadi hapo litakapopatiwa ufumbuzi lakini nitazidi kufuatilia fedha za Simba Fifa,” alisema Rage.