YANGA YASISITIZA BADO HAIJAUKUBALI MKATABA WA AZAM TV

BENO NJOVU (KULIA) AKIWA NA MWENYEKITI WAKE, YUSUF MANJI

Uongozi wa Yanga, umesema hauna mpango wa kuketi chini kujadiliana na Kampuni ya Azam TV yenye mamlaka ya kuonyesha mechi za Ligi Kuu Bara na kusema msimamo wao ni uleule.

Kauli hiyo iliyotolewa na Katibu Mkuu wa Yanga, Benno Njovu inakinzana na taarifa ya Rais wa Shirikisho la Soka Tanzania (TFF), Jamal Malinzi, aliyeahidi kuzikalisha chini pande zote (Yanga na Azam TV) ili kutatua utata uliopo kwa ajili ya Azam TV kuonyesha mechi zao.

Tayari Azam TV imeingia mkataba na Bodi ya Ligi na TFF kwa ajili ya kurusha mechi za ligi huku kila klabu ikinufaika na kitita cha Sh milioni 100. Hata hivyo, ni Yanga pekee iliyogomea kiasi hicho kwa madai kuwa ni kidogo kwao.

Katibu Mkuu wa Yanga, Benno Njovu, amesema hawana mpango huo wa kuketi chini na msimamo wao ni uleule.

“Yanga haijawahi na haina mpango wa kukaa chini kuzungumza na hao Azam TV kujadili suala hilo. Taarifa za awali kila mmoja anazijua na msimamo wetu ni uleule,” alisema Njovu.

Katika mkutano mkuu wa klabu hiyo uliofanyika Januari 19, mwaka huu kwenye Ukumbi wa PTA, Dar, Mwenyekiti wa Yanga, Yusuf Manji, aliapa kuwa kiasi hicho hakiwezi kukubalika na kuiomba bodi ya udhamini chini ya Francis Kifukwe kusimamia vilivyo haki yao kwa kupinga kiasi hicho.

Njovu amesema wanachotaka kusikia ni Azam TV kuwaongeza mkwanja, hadi ufikie ule unaoendana na hadhi ya Yanga.