HATIMAYE BOBAN AVUNJA UKIMYA, AWAFUNGIKIA VIONGOZI

Kiungo wa Coastal Union, Haruna Moshi ‘Boban’, amesema viongozi wa soka hapa nchini wanatakiwa kubadilika endapo wanataka kuona soka la Tanzania linakua, vinginevyo haliwezi kuendelea.

Boban, kwa sasa pamoja na wachezaji wenzake kadhaa, wamesimamishwa na uongozi wa Coastal ambao pia umeamua kwenda kuwashtaki kwa Shirikisho la Soka Tanzania (TFF) kutokana na utovu wa nidhamu uliokithiri.

Kiungo huyo amesema ili soka la hapa nchini liweze kukua, viongozi wa timu za ligi kuu wanatakiwa kubadilika kwa kiasi kikubwa.

Boban alisema hayo hivi karibuni baada ya kusikia uongozi wa timu yao umekwenda kuwashtaki TFF.

“Viongozi wetu katika timu za hapa nchini wanatakiwa kubadilika kwa kiasi kikubwa ili kuweza kuhakikisha soka linakua na hata wachezaji wenyewe wataupenda mpira kwa dhati kutokana na wale wanaowaongoza.

“Hata sisi wachezaji tunaposema kuhusu jambo fulani msitulaumu sisi tu, hata viongozi wetu muwaangalie wao, siyo kila wanalolisema ni sahihi.

“Wanatakiwa kubadilika na hamjui labda kwenye timu tunaishi vipi mpaka tunafikia hapa tulipo sasa,” alisema Boban ambaye ni mchezaji wa zamani wa Simba aliyewahi kucheza soka la kulipwa nchini Sweden.