KIPA MBEYA CITY APATA DILI QATAR

BURHANI (KULIA) AKIITUMIKIA TIMU YAKE DHIDI YA SIMBA

Kipa namba moja wa Mbeya City, David Burhan, yupo kwenye mchakato wa kwenda kucheza soka la kulipwa nje ya nchi baada ya kupokea ofa mbalimbali kutoka nchi tatu tofauti.

Burhan ambaye aliisaidia timu yake kupanda ligi kuu msimu huu, amefanikiwa kuonyesha uwezo mkubwa licha ya ugeni kwani katika michezo 23 aliyocheza, ameruhusu mabao 15 pekee.

Burhan ambaye amebakiza mkataba wa mwaka mmoja kwenye kikosi cha City, amesema mchakato huo unafanywa na wakala wake, Nassor Mussa ambaye ni Askari wa Kitengo cha Upelelezi Iringa na kwamba tayari ameshapata ofa kutoka nchi za Kenya, Zambia na Qatar.

Alisema pia kuna timu za hapa nchini ambazo zimeonyesha nia ya kumtaka msimu ujao na kwamba kwanza anawapa nafasi ya kwanza Mbeya City kufanya nao mazungumzo na akiridhika na dau anaweza kubaki.

“Nashukuru Mungu mpaka sasa nimepokea ofa nyingi sana kutona ndani na nje, wakala wangu ndiyo anafuatilia kila kitu lakini tambua bado nina mkataba na Mbeya kwa hiyo nitawasikiliza wao kwanza kabla ya wengine lakini zaidi ndoto zangu ni kucheza soka la kulipwa,” alisema Burhan.