LOGA: TAMBWE AKIONDOKA, AMEIMALIZA SIMBA

TAMBWE KAZINI

Kocha Mkuu wa Simba, Zdravko Logarusic, amesema litakuwa ni pigo kubwa kuondoka kwa mshambuliaji wake, Amissi Tambwe mwishoni mwa msimu huu.

Loga amesema itakuwa ni sawa na kuwa na adui kwenye nyumba yako mwenyewe kwa kuwa Tambwe kwa sasa ndiyo staa kwenye kikosi cha Simba na timu hiyo haitakiwi kuuza mchezaji bora bali kununua wachezaji bora.

Imeelezwa kuwa timu ya Azam FC inamnyemelea mchezaji huyo kutokana na kuona anafaa kuisaidia katika michuano ya kimataifa msimu ujao, lakini na Tambwe naye amekiri kuwa anawasubiri mabingwa hao wapya.

Akizungumza na Championi Jumatano, Loga alifunguka kuwa kikosi hicho kinahitaji marekebisho makubwa msimu ujao na iwapo Tambwe ataondoka hali itakuwa tete kwa kuwa itakuwa siyo nia yao sahihi.

“Tambwe ni mchezaji mzuri na ameisaidia timu kwa kiasi kikubwa iwapo ataondoka hili litakuwa pigo kubwa kwetu, huyu ndiyo staa kwetu na hilo halina ubishi.

“Siyo taarifa rasmi kuwa anaweza kuondoka lakini kama akiondoka hakika atakuwa adui kwetu kwa kuwa atakuwa anatufunga na kutuzuia kwenda mbele tunapotaka.

“Simba inahitaji marekebisho makubwa msimu ujao ili kuweza kupata wachezaji wenye viwango watakaoleta ushindani kwenye ligi na hatimaye kutwaa ubingwa lakini siyo kuwauza wale bora,” alisema Loga.

Tambwe amefanya kazi kubwa msimu huu akiwa ndiye kinara kwa ufungaji baada ya kufunga mabao 19 hadi sasa ikiwa imebaki mechi moja.

Akizungumza na Championi hivi karibuni Tambwe alisema kuwa bado nia yake ya kuondoka kwenye kikosi cha Simba ipo palepale na anachosubiri ni timu yake hiyo imalizane na Azam ambao wanamtaka.

“Mimi nipo tayari kujiunga na Azam, lakini ninachosubiri ni wenyewe na Simba kukaa mezani na kumalizana kwa kuwa mimi ni mchezaji wa Simba kwa sasa,” alisema Tambwe.