MAKALA: INAWEZEKANA NI WAKATI MWAFAKA WA KURUDI KWENYE MAKOMBE

Na Saleh Ally

INAWEZEKANA kabisa kwamba wakati mwafaka kwa Arsenal umewadia, itafuta ukame wa makombe bila ya kujali ni la Premiership, FA au Kombe la Ligi.

Mara ya mwisho Arsenal kutwaa kombe kati ya hayo matatu yanayotambulika England ni mwaka 2005 na lilikuwa ni Kombe la FA.

Baada ya hapo, Arsenal chini ya Arsene Wenger wamekuwa wakiyashuhudia makombe hayo kwenye ‘kideo’, taratibu miaka imesonga mbele hatimaye imefika kipindi sasa inaonekana kama makombe kwao ni hadithi na ndiyo kitu cha ‘kuwasimangia’.

Lakini kutiga fainali juzi kwa changamoto ya mikwaju ya penalti baada ya sare ya bao 1-1 huku Fabiasnki akiokoa penalti mbili na kuwa shujaa, kunaonyesha kuwa Arsenal sasa wanaweza kubadili upepo huo wa kusimangwa.

Kwamba ni timu inayogombea nafasi nne za juu ili kucheza Ligi ya Mabingwa Ulaya na si vinginevyo, kwani hata ubingwa wa Premiership mara ya mwisho ilikuwa ni msimu wa 2003-04.

Baada ya hapo hakuna makombe, mfumo wa kikosi chake ni kucheza soka la kuvutia, inaongoza ligi mwanzoni na inapofikia hatua za mwisho, taratibu inaanza kupiga ‘rivasi’ hadi kushika nafasi angalau ya tatu au hata ya nne kabisa!

Safari hii katika Premiership, hali hiyo imeanza kujitokeza, kweli Arsenal imeporomoka hadi kufikia katika nafasi ya tano, wakati ilikuwa inaongoza kwa tofauti ya pointi zaidi ya 10.

Inawezekana wakati wa kufuta makosa, wakati wa kubadilika au kufuta ‘nuksi’ umewadia. Maana Arsenal imefanikiwa kuingia fainali ya Kombe la FA baada ya miaka nane, mara ya mwisho ilikuwa mwaka 2005 ilipoingia fainali dhidi ya Man United na kushinda kwa mikwaju 5-4 ya penalti baada ya dakika 90 zenye majibu ya 0-0.

Sasa wamerudi tena, fainali ni dhidi ya Hull City inayokipiga Ligi Kuu England, lakini Arsenal wanachotaka ni kombe.

Kombe kwa Arsenal ni sawa na dawa, ni sawa na gia mpya ya kuanza maisha mapya kwamba ni timu bora ambayo inaweza kuchukua makombe na si pasi nyingi na soka la kuvutia lakini kila msimu wanaibuka patupu.

Ukiangalia uwezo wa kikosi uko juu, utaona mechi ya nusu fainali dhidi ya Wigan ilivyokuwa ngumu hiyo juzi, lakini Arsenal ikaweza kuhimili na kusawazisha na baadaye kuvuka kwa mikwaju ya penalti.

 Bado Arsenal si ya kuidharau kama utaihusisha na kombe hilo kongwe kuliko mengine yote ya England. Imelitwaa mara 10 na inazidiwa na Man United pekee ambayo imelibeba mara 11, hivyo hii inaonyesha ina nafasi kwa maana ya rekodi.

Lakini rekodi pekee hazilipi kila kitu, kwani Arsenal imeingia fainali mara 18 na kufanikiwa kulibeba kombe hilo mara 10. Maana yake imepoteza fainali nane ikiwemo ya mwaka 2001 dhidi ya Liverpool ambayo vijana wa Wenger walilala kwa mabao 2-1.

Wenger, mwenyewe ana rekodi ya kulibeba kombe hilo mara nne, si haba, kwani alipotua mwaka 1996 akitokea Japan, miaka miwili baadaye akalibeba na baada ya hapo akaongeza mara tatu, 2002, 2003 na 2005.

Maana yake katika miaka ya 2000, tayari Arsenal imebeba kombe hilo mara tatu pamoja na kwamba sasa imelikosa mara nane, huu unaweza kuwa msimu mzuri kwake kulibeba na kulitumia kama dawa ya kubadili mwelekeo na kuachana na ule wa kutobeba makombe.

Presha kubwa ya Arsenal ni makombe, hata wale mashabiki wanaolaumu kuhusiana na Wenger ni kwa kuwa kikosi chao hakibebi makombe ukilinganisha na wapinzani wao Manchester United na hata Liverpool ambayo pamoja na kukosa ubingwa wa Ligi Kuu England kwa miaka zaidi ya 20, lakini angalau wanajikongoja na kufikia kubeba hadi ubingwa wa Ulaya.

Lakini presha inazidi kupanda zaidi kwa Arsenal ambao wanaamini ‘vijana’. Wakati Man City na Chelsea nazo zikiendelea kufurukuta, Arsenal inaendelea kusuasua.

Fainali ya Kombe la FA itakayopigwa Wembley Mei 17 ndiyo itatoa jibu kwamba Arsenal imebadili mwelekeo au itaendelea kuchepuka njia kuu ya makombe bila ya kuchoka!

TIMU ZILIZOCHUKUA MARA NYINGI ZAIDI:

TIMU                            MAKOMBE                 FAINALI

Man United                    11                                18

Arsenal                           10                              17

Tottenham                       8                                        14

Aston Villa                       7                              13

Chelsea                              7                               13

Liverpool                           7                              11

ARSENAL IMETWAA FA MARA 10

1930, 1936, 1950, 1971, 1979, 1993, 1998, 2002, 2003, 2005

FAINALI ZA MIAKA YA 2000

2000          Chelsea    Vs  Aston Villa 1-0  

2001          Liverpool           Vs Arsenal    2-1

2002          Arsenal     Vs Chelsea   2-0

2003          Arsenal     Vs Southampton    1-0

2004          Man United Vs Millwall  3-0

2005          Arsenal  Vs Man United   0-0 (Dk 120)

          Arsenal shinda penalti 5-4                

2006          Liverpool Vs West Ham United         (Dk 120)

          Liverpool shinda penalti 3-1             

2007          Chelsea    Vs Man United         1-0

2008          Portsmouth Vs Cardiff City 1-0

2009     Chelsea  Vs Everton   2-1

2010    Chelsea Vs   Portsmouth       1-0

2011            Man City Vs Stoke City    1-0

2012            Wigan Vs Man City  1-0