NDANDA WANA SH MILIONI 1.1 WAKATI BAJETI YAO NI BILIONI 1.3!

Kuonyesha imeanza kujipanga mapema kwa ajili ya Ligi Kuu Bara msimu ujao, Ndanda FC ya Mtwara imeomba wadau kuisaidia timu hiyo ambapo nia yao ni kufikisha shilingi bilioni 1.3 ili ishiriki ligi vizuri.

Ndanda FC ambayo ni miongoni mwa timu tatu zilizopanda msimu huu ikiwa pamoja na Polisi Moro na Stand United, imesema hivyo huku ikidai kwenye akaunti yake, tayari inamiliki shilingi milioni 1.1.

Katibu Mkuu wa Ndanda, Suleiman Kachele, ameeleza kuwa wameandaa mikakati kabambe ya kuhakikisha wanaingia ligi kuu kwa kishindo na wachezaji wenye viwango ili kutoa ushindani mkali.

“Tunatarajia kukutana Jumamosi kwa kuwakutanisha wadau mbalimbali ili waweze kusaidia katika bajeti yetu ambapo tunahitaji kiasi cha shilingi bilioni moja na milioni mia tatu.

“Mpaka sasa sisi tuna kiasi cha shilingi milioni 1.1 ambacho hakitutoshelezi, hivyo ni vyema wadau mbalimbali wakajitokeza kutusaidia kwani tumepanga kuwatembelea watu tofauti watusaidie,” alisema.