AZAM WAMPA KAVUMBAGU MAJUKUMU KAMA YALE YA TP MAZEMBE

Mshambuliaji mpya wa Azam FC, Didier Kavumbagu, amesema amesaini mkataba wa kuichezea timu hiyo kwa sharti moja la kuhakikisha anafikia rekodi ya Klabu ya TP Mazembe ya DR Congo katika michuano ya Ligi ya Mabingwa Afrika (Caf) watakayoshiriki, mwakani.

Kavumbagu ambaye ni raia wa Burundi, amesaini mkataba huo hivi karibuni baada ya ule wa miaka miwili aliokuwa anautumikia akiwa na Yanga kumalizika kabla ya Azam kumsajili yeye na kiungo mkabaji, Frank Domayo.

Akizungumza na Championi Jumatano, Kavumbagu alisema hilo ni kati ya sharti alilopewa katika kuipa mafanikio timu hiyo tajiri nchini baada ya kufanikiwa kutwaa ubingwa wa ligi kuu.

Mrundi huyo alisema Azam imemsajili maalum kwa ajili ya michuano ya kimataifa ambayo wanaamini ataisaidia timu hiyo kutokana na uzoefu mkubwa alionao wa kushiriki michuano hiyo.

Aliongeza kuwa, sharti hilo la kuifikia rekodi ya Mazembe ni gumu kwake, lakini atatumia uzoefu wake katika kuhakikisha anaifungia timu yake mabao kwa kila nafasi atakayopata.

“Ujue klabu yoyote inapokusajili kuna mahitaji inayoyataka kwako, ikiwemo kuipa mafanikio ya ubingwa, ninaamini wao wameniona ninafaa, hivyo nitafanikisha hicho wanachokihitaji.

“Itakuwa ngumu kufikia rekodi ya TP Mazembe ya kutwaa Klabu Bingwa Afrika pamoja na kufika fainali ya Klabu Bingwa Dunia, lakini naamini tutapambana mpaka mwisho na tutafanikiwa,” alisema Kavumbagu.

 SOURCE: CHAMPIONI