CHAMBUA ASHAURI WATANO WA KUSAJILIWA YANGA

Mshambuliaji wa zamani wa Yanga, Sekilojo Chambua, amesema kama kikosi cha Wanajangwani hao kinataka kurejea kwenye makali yake msimu ujao, ni lazima kisajili wachezaji watano wa safu za kiungo, beki na ushambuliaji.

Yanga msimu huu ilishindwa kutetea kombe lake la Ligi Kuu Bara baada ya Azam kufanikiwa kulitwaa kwa mara ya kwanza tangu ilipopanda ligi kuu mwaka 2007.

Chambua alisema tatizo kubwa ambalo liliikumba Yanga na inatakiwa kufanya marekebisho, ni katika safu ya ulinzi wa kati ambapo wanahitajika mabeki wawili.

Alisema pia kiungo anatakiwa atafutwe mmoja mwenye uwezo mkubwa na mzoefu kwa kuwa kasi ya Nizar Khalfan imepungua nguvu kutokana na umri kuwa mkubwa.

Katika safu ya ushambuliaji, wanahitajika watu wawili wa kuziba pengo la Didier Kavumbagu aliyetimkia Azam na Emmanuel Okwi, kwani hana uhakika kama ataendelea kuwepo kikosini hapo, hivyo atafutwe mshambuliaji mwenye uwezo kama wake.

“Kuna matatizo madogo-madogo lakini ni lazima wafanye usajili kwenye safu ya ulinzi, wanahitajika wachezaji wawili, kiungo mmoja na washambuliaji wawili wa kuziba pengo la Kavumbagu na Okwi, ni vizuri kocha akakaa na viongozi ili watafute straika mzuri mwenye uchu wa mabao! Wakifanya hivyo nafikiri msimu ujao watatisha,” alisema Chambua.