CHOKORAA AMTWANGA BONDIA NA KUMTEGUA BEGA, SASA ATAKA MWINGINE

CHOKORAA AKIWA AMEBEBWA NA MENEJA DAKOTA NA BONDIA MAARUFU NCHINI, THOMAS MASHALI

Mwanamuziki wa Bendi ya Mapacha watatu aliyejitosa kwenye fani ya masumbwi, Khalid Chuma 'Chokoraa' usiku wa kuamkia jana (Jumapili) alimchakaza mpinzani wake, Abdul Mayenza 'Puly' kwa Knock Out raundi ya kwanza baada ya kumvizia na kumtandika kisawasawa ngumi nzito iliyomtegua bega la kushoto.

Katika pambano hilo lililokuwa la utangulizi la raundi nne uzito wa  Light Weilter lililofanyika Ukumbi wa Friends Corner jijini Dar es Salaam, lilianza kwa kasi kila mmoja akimtupia mwenzake makonde kuonesha hali ya kukamiana.

AKIINULIWA MKONO NA MWAMUZI BAADA YA USHINDI

Raundi hiyo ikiendelea Chokoraa aliyekuwa akitokea kona nyekundu alimbana mpinzani wake kwenye kona ya bluu na kumpa ngumi nzito mfululizo zilizomfanya aonekane kukata pumzi na kulalia kwenye kamba ya kona hiyo mpaka alipookolewa na mwamuzi wa mchezo, Said Chaku.

Baada ya kuokolewa pambano lilianza tena ambapo Chokoraa alimvizia tena Puly na kumtandika ngumi kali iliyomtegua bega la kushoto na kumfanya ashindwe kuendelea na raundi ya pili hivyo mwamuzi Chaku alimaliza pambano hilo kwa kumpa Chokoraa ushindi wa Knock Out 'KO'.

Akizungumza na Championi Jumatatu, Puly alisema katika pambano hilo bahati haikuwa yake lakini akipona bega lake ataendelea kujifua ili arudiane na mpinzani wake huyo.

Naye, Khalid Chokoraa alijisifia kuwa ni mazoezi makali aliyofanya na sasa anataka mpinzani mwingine katika uzito wake.