MASHALI, MAUGO WAZICHAPA KAVUKAVU MANZESE

MASHALI MWENYE KOFIA NA RASTA, AKIMTUPIA KONDE MAUGO MWENYE SHATI YA MISTARI.

Mabondia Mada Maugo na Thomas Mashali usiku wa kuamkia jana (Jumapili) walitibua hali ya hewa baada ya kutwangana nje ya ulingo wakati wakisubilia pambano la mabondia wenzao, Karama Nyilawila na Said Mbelwa waliokuwa wakigombea mkanda wa ubingwa wa UBO katika Ukumbi wa Friends Corner Manzese jijini Dar es Salaam.

Katika tukio Mashali kwa muda mrefu alionekana akikata kilaji na bondia mwenzake, Francis Miyeyuso 'Chichi mawe' aliyekuwa na mkewe lakini baada ya muda aliwaacha na kwenda kukaa karibu na Maugo. Muda si mrefu Mashali alionekana kubwatizana na Maugo ambapo wote walisimama na kuvaana hali iliyosababisha vurumai na viti kurushwa hovyo lakini baada ya muda waliamuliwa.

Baada ya sakata hilo kutulia Championi Ijumaa lilizungumza na Maugo ambaye alisema ameshangazwa na ugomvi huo ambao inaonekana Mashali aliupanga.

"Yaani mimi namshaangaa huyu, mimi nimejikalia zangu hapa sijui amekula miunga yake na mipombe anakuja kuntukania mama yangu, hivi anamjua mama yangu huyu," alisema Maugo huku akiporomosha matusi ya nguoni.

Gazeti hili lilizungumza na Mashali kuhusiana varangati hilo ambapo bondia huyo aliendelea kumwaga matusi mazito kwa mwenzake.

"Hana lolote nimeshamdunda mara mbili ulingoni, kwanza Diamond Jubilee na mara nyingine pale PTA Sabasaba lakini hataki kuniheshimu, wangeacha na leo nimfunze tena adabu nje ya ulingo," alisema Mashali huku pia akiporomosha maneno makali.