KAPOMBE ASEMA HAKUONYESHA KIWANGO ANACHOTAKA DHIDI YA ZIMBABWE

KAPOMBE AKIWA MAZOEZINI NA GALLAS WAKATI HUO AKIKIPIGA AS CANNES YA UFARANSA

Aliyekuwa beki wa Simba, Shomari Kapombe, amewataka Watanzania kumsamehe kutokana na kiwango cha chini alichoonyesha katika mchezo wa kimataifa dhidi ya Zimbabwe.

Stars ilivaana na Zimbabwe kwenye mchezo wa kutafuta tiketi ya kucheza fainali za Kombe la Mataifa ya Afrika mwakani nchini Morocco.

Katika mechi hiyo iliyofanyika kwenye Uwanja wa Taifa jijini Dar es Salaam, Kapombe alionyesha kiwango cha chini wakati alipokuwa akiitumikia timu ya taifa (Taifa Stars), jambo ambalo liliwafanya baadhi ya mashabiki kumpigia kelele kila wakati.

Kapombe amesema kuwa katika mechi hiyo hakucheza vizuri kama ilivyokuwa zamani  akiwa na kikosi cha Simba na hiyo ni kutokana na kuwa nje ya uwanja kwa muda mrefu.

Alisema kutokana na hali hiyo, anaomba wapenzi wa soka hapa nchini wamsamehe kwa hilo ila anaamini kuwa siku chache zijazo atakuwa fiti zaidi na kurudi katika kiwango chake kama ilivyokuwa zamani.

“Hata mimi niliona kuwa sikucheza vizuri katika mechi hiyo, nadhani ni kwa sababu nimekuwa nje ya uwanja kwa muda mrefu bila ya kucheza.

“Hata hivyo, namshukuru Mungu kwani pamoja na hali hiyo nilijitahidi sana ila nawaomba wapenzi na mashabiki wa soka hapa nchini kunisamehe kwa yote yaliyotokea siku hiyo, ila naamini kuwa muda mchache ujao nitarejea katika kiwango changu cha siku zote,” alisema Kapombe.

Katika mechi hiyo iliyofanyika kwenye Uwanja wa Taifa jijini Dar es Salaam, Taifa Stars iliibuka na ushindi wa bao 1-0 lililofungwa na John Bocco.