LUIS ANAWEKA REKODI YA MAUZO, SIMBA, YANGA HAWAJUI UMUHIMU WA MAUZO YA WACHEZAJI!

CHELSEA iko katika hatua za mwisho kuingiza benki kitita cha pauni milioni 50 (Sh120) kwa ajili ya mauzo ya beki wake David Luiz raia wa Brazil.

Luiz ni kati ya mabeki na viungo bora wa ulinzi, amekuwa na mafanikio makubwa katika kikosi cha Chelsea na amewasaidia sana na kufanya kazi yake kwa ufasaha.

Kutokana na kuonyesha uwezo, klabu inayomilikiwa na milionea wa Kiarabu ya Paris Saint German imeamua kuonyesha nia yake ya kumnasa na mambo yameenda safi, kweli inatoa kitita cha pauni milioni 50.

Klabu hiyo ya Ufaransa maarufu kama PSG imekubali kutoa fedha hizo ambazo zitakuwa nyingi zaidi kumsajili beki katika historia ya soka duniani. Kama unakumbuka Chelsea ilimnunua Fernando Torres kwa kitita kama hicho kutoka Liverpool.

Hadi leo pauni milioni 50 ndiyo uhamisho ghali zaidi kwenye Ligi Kuu England, maarufu kama Premiership, lakini leo Chelsea inarudisha fedha zake kupitia beki, kitu ambacho kinaonyesha wako makini na biashara.

Biashara inayohusika na soka ni kubwa sana na kama inazidiwa basi na vitu vichache sana kama madini, mafuta na kadhalika. Lakini mchezo wa soka ni biashara inayoweza kuingiza fedha nyingi katika kipindi kifupi sana.

Angalia Taifa Stars inapokuwa inacheza au mechi za kimataifa zinazozihusisha Yanga na Simba, mapato yanakuwa hadi kuzidi Sh milioni 500 katika kipindi cha dakika 90, biashara ipi inaweza kitita kama hicho ambacho kwa makadirio ya kawaida lazima kiwe zaidi kwa kuwa lazima wajanja wachache wawe wamechota vyao tayari.

Nimeanza na mfano wa Chelsea lakini lengo lilikuwa ni kutaka kuwaonyesha na baadaye kuwakumbusha Simba na Yanga ambao wamefunga msimu wakiwa katika nafasi ya nne na pili lakini wote wakiwa wamepata hasara kutokana na kutokuwa na mipango madhubuti ya mauzo.

Simba wamepata hasara kwa Emmanuel Okwi, walimuuza Etoile du Sahel kwa dola 300,000 (zaidi ya Sh milioni 480), lakini hadi leo ni hadithi. Wakamuachia Shomari Kapombe aende AS Cannes ya Ufaransa, kwamba akiuzwa watapata fedha, lakini leo wameambulia ziro. Suala la Okwi linaweza kuwa tofauti na kesi hii, ingawa kwa kuwa Simba haijapata kitu, bado tunabaki humuhumu kwamba viongozi hawako makini hata wanapofanikiwa kuuza wachezaji ‘bure’.

Halikadhalika Yanga, nao mwisho wamemuacha mchezaji kama Frank Domayo akijiunga Azam FC kwa dau kubwa la Sh milioni 70 kama ilivyoelezwa, lakini wao wameambulia patupu.

Hata kwa wale wanaosema mwache Didier Kavumbagu aende, pia hawaangalii kwamba ni hasara kwa Yanga kumuacha aende bila ya yenyewe kupata angalau Sh milioni 25 wakati wenyewe walitoa fedha kumpata.

Hakuna kiongozi mwenye hesabu ya kujua klabu imetumia kiasi gani kuwalea wachezaji hao, lakini hata kuwapa nafasi waitumikie klabu, waonekane, bado klabu inatakiwa kupata faida unapofikia wakati wanaondoka.

Kwa wachezaji wenye umri mkubwa, kuwaachia waende bure bila ya kupata lolote ingekuwa si tatizo sana, lakini si kwa Okwi, Kapombe, Kavumbagu na Domayo ambayo bado wana uwezo wa kucheza kuanzia miaka minne hadi kumi ijayo.

Hii inaonyesha hakuna hesabu za uhakika kwa viongozi hasa katika suala la kuwasainisha mikataba mipya mapema kila wanapoona wamekaribia kumaliza. Kuwaacha hadi ibaki miezi sita ni sawa na kwenda kulala na kuacha mlango wa duka lako ukiwa wazi ukitaka wateja waone bidhaa unazouza, wakati unawapa nafasi ya kujichagulia na kuchukua wanachotaka bila ya kufanya malipo!

Mkiachana na kupeleka mambo kishabiki, basi kuna kila sababu ya kujifunza na kuangalia kilichotokea kama funzo ingawa kwa Simba ambao walimuuza Okwi, wenyewe tutaendelea kusubiri malipo!