DEWJI MENO 32 YOTE NJE, KISA KUTEMWA KWA WAMBURA

Mfadhiri wa zamani wa Simba, Azim Dewji ameonyesha kuwa mwenye furaha kubwa kutokana na kutemwa kwa Michael Wambura.

Hivi karibuni, Wambura alikata rufaa TFF kupinga hatua ya Kamati ya Uchaguzi ya Simba ambayo ipo chini ya mwenyekiti Dk Damas Ndumbaro kumuengua katika mchakato huo kwa kosa la kufanya kampeni kabla ya muda uliopangwa.

Dewji amesema kuwa, sasa wana matumaini makubwa ya kupata viongozi sahihi watakaoiongoza Simba kwa mafanikio makubwa.

Alisema Wambura ni mmoja kati ya watu wenye uwezo mkubwa wa kutawala, lakini kwa wakati huu hakuwa chaguo sahihi kwa Simba na kuongeza kuwa, yote yaliyotokea juu yake anatakiwa kuyapokea kama changamoto.

“Maamuzi hayo ya TFF, tumeyapokea kwa mikono miwili na huu ndiyo wakati wa sasa kuimarisha Simba, Wambura anatakiwa kukubaliana na hali hiyo na kuzichukua kama changamoto kwake.

“Nikiwa kama mmoja wa wajumbe wa Friends of Simba, kwa upande wetu hatuna chuki na Wambura na tutaendelea kushirikiana naye kwa kila jambo akiwa kama mwanachama mwenzetu wa Simba,” alisema Dewji.