WANAOMUUNGA WAMBURA WALIA 'NJAA', WAELEZA WANAVYOIJADILI KAMATI YA DOKTA NDUMBARO, FOS

Wanachama wachache wa Simba wanaomuunga mkono aliyekuwa mgombea wa urais, Michael Wambura, wamefunguka kuwa hawajafanya kazi yoyote wala kufika maofisini kwao badala yake kila siku kufanya mikutano na vikao kujadili hatima ya ‘rais’ wao huyo.

Juzi, Kamati ya Uchaguzi ya Shirikisho la Soka Tanzania (TFF), ilimuengua rasmi Wambura kwenye uchaguzi huo ambapo alikuwa amekata rufani kupingwa kuenguliwa na Kamati ya Uchaguzi ya Simba iliyo chini ya mwenyekiti Dokta Damas Ndumbaro, kwa kosa la kufanya kampeni kabla ya muda wake.

Wakizungumza na Championi Jumamosi, wanachama hao walisema wamekuwa watu wa kufanya vikao na mikutano kuijadili kamati ya Ndumbaro ambayo imemuondoa Wambura kuwania nafasi hiyo.

“Mfano ni mimi hapa, sijafanya kazi yoyote ile tangu rais wetu aanze kusakamwa. Hii yote ni Ndumbaro na Friends of Simba (FOS)ambao wamepanga kummaliza Wambura, lakini nasema lazima haki itendeke ikiwezekana tutaenda mahakamani.

“Julio na Aveva wote walijinadi kwenye vyombo vya habari, iweje Wambura ndiye asakamwe?” alihoji mmoja wa wanachama Tawi la Mpira na Maendeleo, Upanga Magharibi.

Hata hivyo, Aveva na Wambura wote walionywa awali baada ya kubainika wamefanya kampeni. Baadaye Wambura akarudia.

Pamoja na wengi wanaomuunga mkono Wambura kuwa wanailaumu kamati ya uchaguzi ya Simba, lakini kamati iliyothibitisha kuwa kweli alipiga kampeni ni ile rufaa ya TFF.