MAKALA: KOMBE LA DUNIA SI KOMBE TU, WANAFUATA PIA HIZI NOTI

WAKATI watu wanasubiri kwa hamu burudani ya michuano ya Kombe la Dunia inayoanza kesho, mamilioni ya fedha yatakayotumika yanaonyesha kiasi gani inastahili kuwa michuano maarufu zaidi ya soka duniani.

Kombe la Dunia, kila nchi inataka kushiriki. Kwa hali ya kawaida inajulikana ni njia ya kusaka heshima, lakini bado kuna kitu kimejificha ndani yake.

Heshima kwa ajili ya rekodi za nchi, sawa. Lakini mamilioni ya fedha yanayopatikana katika michuano hiyo yanaivuta nchi yoyote kutaka kupata nafasi ya kushiriki.

Shirikisho la Soka la Kimataifa (Fifa) ambalo ni mmiliki wa michuano hiyo limetangaza kuongeza mamilioni ya dola katika michuano ya 2014 ukilinganisha na ile ya miaka minne iliyopita nchini Afrika Kusini.

Zaidi ya dola biloni moja, zitatumika ukijumlisha za zile za kukamilisha maandalizi.

Lakini fedha za zawadi pekee kwa michuano ya Brazil 2014 ni dola 576, ikiwa ni ongezeko la asilimia 37 kwa upande wa zawadi.

Fedha hizo zinajumlisha kitita cha dola milioni 70 ambazo watalipwa timu za Brazil kama ambavyo umekuwa ni utaratibu wa Fifa kuzilipa timu za sehemu husika inapofanyika michuano hiyo.

Lakini usisahau, timu zote 32 zinazoshiriki michuano hiyo, kila moja tayari imelamba kitita cha dola milioni 1.5 kwa ajili ya maandalizi.

Si kwamba baada ya maandalizi, timu hizo zitasubiri kupata ushindi ili kupata zawadi nyingine ya milioni ya shilingi, kila hatua ina malipo yake.

Kuhakikisha kama kweli michuano hiyo ni ya noti kweli, kila timu itakayotolewa katika hatua ya makundi, kabla ya kuondoka, inaangwa na kitita cha dola milioni 8.

Baada ya hapo, mbili kila kundi zinafuzu hatua ya 16 Bora, zile zitakazotolewa katika hatua hiyo, kila moja itaondoka na fungu la dola milioni 9.

Fedha haziishii hapo, bado kuna zawadi ya wale wanaotolewa inakuwa inaendelea. Utaona hapa kuna tofauti kubwa, kwani kila anayetolewa, anatuzwa. Wao Fifa wanasema ni fedha za shukurani kwa ushiriki kwa yule aliyetolewa.

Timu ikitolewa hatua ya robo fainali, nayo inalamba dola milioni 14. Maana yake kila timu inayosonga mbele, haipati kitu lakini inazidi kusogea kwenye mamilioni kwa wingi zaidi.

Maana yake sasa ni hatua ya nusu fainali na hapo ndiyo kufuru ya fedha za Fifa inaanza kuonekana kwa kuwa timu zinakuwa zimebaki nne tu.

Itakayoshika nafasi ya nne inapata dola milioni 20 na dola milioni 22 zinatolewa kwa anayepata nafasi ya tatu.

Zinabaki timu mbili ambazo unazungumzia fainali, wengi hapa akili inakuwa ni katika kombe maarufu zaidi katika soka kwa kuwa kulitwaa ni heshima kubwa.

Lakini bado kuna fedha nyingi zaidi, timu itakayopoteza katika fainali inashika nafasi ya pili na kupata dola milioni 25 wakati bingwa anaongezewa milioni 10 zaidi.

Dola milioni 35 kwa bingwa si kiduchu, fedha ambazo zingeweza kuendesha soka ya Tanzania kwa zaidi ya miaka mitatu kwa mafanikio na mabadiliko makubwa.

Hivyo usione wanaume wanapambana uwanjani ukadhani wamejenga kupata heshima au ujiko pekee, noti noti pia ni nguvu nyuma ya msukumo wa ushindi.