MASHABIKI YANGA WAULA, KUANGALIA KOMBE LA DUNIA RAHA MUSTAREHE

Klabu ya Yanga imetoa nafasi ya mashabiki wake kuona michuano ya Kombe la Dunia katika mazingira mazuri.

Katibu Mkuu wa Yanga, Beno Njovu amesema mashabiki na wanachama wa Yanga wamepewa nafasi ya kuangalia michuano ya Kombe la Dunia kupitia ukumbi wa sinema wa Quality Centre uliopo jijini Dar es Salaam.

Akizungumza na SALEHJEMBE, Beno alisema wameamua kufanya hivyo kwa kuwa mazingira ya eneo hilo ni mazuri na ‘screen’ ni kubwa hivyo wataona mpira kama wako uwanjani.

“Unajua wataona mpira kwa hali nzuri zaidi kwa maana ya mazingira lakini mfumo wa kuonyesha ni HD, picha zinakuwa katika kiwango cha juu sana na mtu atajihisi utafiriki yuko Brazil.

“Lengo ni kuwakutanisha pamoja ili wafurahi huku wakiangalia mpira, hivyo mechi zote zikiwemo zile zinazoanza saa saba usiku zitaonyeshwa pale, bure,” alisema Njovu na kuongeza.

“Labda nisisitiza, mashabiki wa Yanga na wanachama tumewaalika kufika na kujumuika. Lakini tunawakaribisha na wapendi wengine wa mpira wajumuike kwa kuwa soka ndiyo mchezo unaoweza kuwakutanisha watu kwa pamoja.”

Ndani ya jengo la Quality Centre kuna majumba matatu ya kuonyeshea filamu na kubwa kuliko yote lina uwezo wa kuchukua watazamaji 200.

Njovu alisema watakuwa wakifungua majumba mengine ya kuonyeshea filamu kama idadi ya mashabiki itakuwa kubwa sana.

Hii itakuwa ni mara ya kwanza kwa klabu kutoa ofa kwa mashabiki wake kushuhudia michuano ya Kombe la Dunia katika sehemu nzuri.