MAXIMO KUITUMIA RIPOTI YA PLUIJM KUISUKA YANGA

Uongozi wa Klabu ya Yanga, umesema kuwa usajili wa Kocha Mbrazili, Marcio Maximo lazima ufanywe kwa kutumia ripoti ya aliyekuwa Kocha Mkuu wa timu hiyo, Mholanzi, Hans van Der Pluijm.

Mbrazili huyo anatarajiwa kutua siku yoyote kwa ajili ya kukinoa kikosi hicho kinachotarajiwa kushiriki Ligi Kuu Bara na Kombe la Shirikisho Afrika.

Katibu Mkuu wa timu hiyo, Beno Njovu, alisema kuwa Pluijm ndiyo anajua upungufu wa kikosi hicho, hivyo lazima kocha atakayekuja kuifundisha timu hiyo, atumie ripoti yake.

Njovu alisema kikubwa wanachohofia ni kujaza wachezaji wengi katika nafasi moja kama ilivyojitokeza kwenye msimu uliopita, lengo timu hiyo ifanye vizuri katika msimu ujao.

Aliongeza kuwa, kikosi chao hakihitaji maboresho makubwa, zaidi ni kuongeza wachezaji watano katika usajili wa msimu ujao, usajili utakaowahusisha profesheno na wazawa.

“Usajili wa timu siku zote unafanywa na kocha aliyekuwa na timu katika msimu wa ligi, yeye ndiye aliyeona upungufu wa kikosi chake, hivyo lazima ripoti yake tuiheshimu kwa kuifanyia kazi.

“Huyo kocha mpya kama akija atakabidhiwa ripoti hiyo na katika ripoti hiyo ya usajili, kama kuna mchezaji anamfahamu na angependa kumsajili basi haraka tutamsajili.

“Kati ya nafasi ambazo zinahitajika kufanyiwa marekebisho ni safu ya beki wa pembeni namba tatu, kiungo na mshambuliaji mwenye uwezo wa kufunga,” alisema Njovu.