STENDI UNITED WAZIDI KUKOMAA NA BAHANUZI WA YANGA

Wakati harakati za usajili kwa timu za Ligi Kuu Bara zikizidi kushika kasi, uongozi wa Stand United ya Shinyanga, umejikita rasmi katika harakati za kuhakikisha unamnasa mshambuliaji wa Yanga, Said Bahanuzi ambaye kwa sasa yupo huru kujiunga na timu yoyote.

Hivi karibuni kumekuwepo na tetesi kuwa klabu hiyo iliyopanda ligi kuu miezi michache iliyopita, inamhitaji mchezaji huyo ili aweze kuitumikia katika michuano ya ligi hiyo msimu ujao ambapo wanashiriki kwa mara ya kwanza.

Kocha wa Stand, Athuman Bilal ‘Bilo’, amesema viongozi wa Stand United juzi Alhamisi walifanya kikao cha pamoja kwa ajili ya kujadili suala la kumnyakua mshambuliaji huyo aliyejiunga na Yanga misimu miwili iliyopita akitokea Mtibwa, ambaye kiwango chake kimeshuka ghafla.

“Bado hatujakamilisha usajili wetu, uongozi unaendelea na utaratibu huo, pia kuhusiana na Bahanuzi ndiyo kwanza tumeamua kumfungia kazi ili msimu ujao tuwe naye na njia za kupita tayari jana (juzi), tumezizungumzia katika kikao chetu.

“Ni matumaini yetu kuwa Mungu akipenda mchezaji huyo tutakuwa naye msimu ujao,” alisema Bilal.