BARUA YA MANJI KWA AVEVA NA SIMBA, YANGA RANGIRANGI

NAJUA ulipata taarifa kwamba Mwenyekiti wa Yanga, Yusuf Mehbub Manji aliandika barua kwenda kwa rais mpya wa Simba, Evans Aveva.

Barua ya Manji kwenda kwa Aveva ilikuwa ni kumpa pongezi kutokana na kufanikiwa kwake kutwaa uongozi wa Simba.

Pongezi na kumkaribisha kwenye mbio za kuendeleza soka na inaelezwa Manji alisisitiza yuko tayari kupambana na Simba uwanjani, pia kushirikiana na Aveva na timu yake ya uongozi kusaidia kupatikana maendeleo makubwa kwa klabu hizo mbili kongwe.

Yanga na Simba, iwapo zitatokea zikavurunda, basi kwa kiasi kikubwa zinachangia kuyumba kwa soka hapa nchini kutokana na nguvu zao na sapoti kubwa kutoka kwa wanachama na mashabiki wake.

Siku hizi wameibuka baadhi ya viongozi wa Azam FC ambao wanakasirishwa eti kwa kuwa stori zao hazijatumika na kuwa kubwa kama zile za Yanga au Simba, wakiamini sasa ni wakubwa sana, kitu ambacho kinaonyesha kiasi gani hawajui walipo.

Hakuna ubishi Yanga na Simba, zimebeba sehemu kubwa ya mpira wa Tanzania lakini zimekuwa zikishindwa kusonga mbele au kufanya vizuri zaidi kutokana na ukosefu wa mambo mengi sana.

Kwanza hazishirikiani, pili watu wake wamejengewa uzio, kila upande unataka uishi peke yake na zimekuwa ni timu za rangi, eti Yanga wakimuona aliyevaa nyekundu anakuwa adui, hali kadhalika kwa Simba na njano.

Wakati wa enzi za miaka ya 1930, 1940 hadi 1970, Simba na Yanga walikuwa ndugu nje ya uwanja, ndiyo maana akifariki mtu ambaye ni mwanachama wa Simba, basi Yanga ndiyo walikuwa wanafanya kazi zote msibani huku wakiwasihi wafiwa kukaa pembeni.

Hilo lilikuwa ni kuthibitisha kuwa kweli Yanga na Simba ni watani wa jadi, lakini sasa sivyo, Simba na Yanga ni maadui wa jadi na wale wanaoabudu rangi za njano na nyekundu, mimi nawaita mashabiki na wanachama wa rangirangi, maana hawajui lolote.

Manji ameamua kumuandikia barua kumpongeza Aveva, huo utakuwa ni mwanzo mpya wa wale rangirangi kuanza kutafakari kama mwenyekiti wa klabu hiyo anaweza kufanya hivyo, basi wajifunze, wang’amue kuwa ushindani wa timu hizo kama alivyoeleza Manji, utakuwa uwanjani na kupambana kila sehemu.

Halafu Yanga na Simba, zinaweza kuwa na nafasi ya kuunganisha nguvu sehemu, mfano katika kusaka wadhamini au kugombea maslahi yao kwa kuwa wakati mwingine hazipati hadhi inayostahili na imefikia hata zinaanza kulinganishwa na timu ambazo zisipocheza dhidi ya timu hizo kongwe, haziwezi kuingiza hata Sh 500,000, kitu ambacho si haki pia ni kuzinyonya.

Msijisikie vibaya kumpongeza Manji, ameonyesha ni mtu ambaye ana lengo zuri na anapaswa kuungwa mkono. Anataka kusaidia kuziondoa klabu hizo kongwe kwenye uongozi wa kizamani uliojaa ushabiki usiokuwa na manufaa na kuangalia maslahi ya klabu hizo.

Ninaamini kwa Aveva, hakuna shaka, si wale viongozi wa kizamani ambao wanataka kujali matumbo yao bila kuangalia klabu inafaidika nini na kipi ni mafanikio.

Vizuri uamuzi wa Manji kutuma barua kwa Aveva na Aveva kuipokea barua ya Manji ichukuliwe kama changamoto na kuanza upya kwa karne ya Yanga na Simba zenye jicho linaloona mbali kama lile la mwewe.

Yanga na Simba wa rangirangi, muda wao umekwisha kwa kuwa wamezidumaza klabu hizo. Sasa ushirikiano kwenye maslahi ya klabu, iwe inawezekana lakini kushindana uwanjani, iwe kama kawa.

Wale wazee wa zamani ambao wana mifano mizuri kama kuzijengea klabu hizo majengo, ndiyo walikuwa wakifanya hivyo, yaani kushirikiana. Mlipoingia nyie rangirangi, mkachangia klabu hizo kuanza kudumaa.

Sasa ni Aveva na Manji na huu ndiyo wakati mwafaka wa kuanza upya na kasi ya maendeleo ianze kupigwa, Yanga na Simba ni tajiri lakini hazikuwa zimepata wanaoangalia mbali. Tafadhali, Manji, Aveva, endeleeni kuinua vichwa.