KWENDA TUKUYU MAPEMA, KUMBE TAIFA STARS INAKIMBIA DENGUE

Tayari timu ya Taifa, Taifa Stars ipo kwenye harakati za mwisho za kuanza kambi yake leo huko Tukuyu, Mbeya kwa ajili ya maandalizi ya mchezo wao dhidi ya Msumbiji huku sababu ya kuwapeleka mkoani humo ikitajwa ni kuyaepuka magonjwa ya Malaria na Dengue.

Stars inatarajiwa kuvaana na Msumbiji Julai 20, mwaka huu kwa ajili ya kutafuta tiketi ya kufuzu kushiriki michuano ya Michuano ya Mataifa Afrika (AFCON) itakayofanyika mwakani nchini Morocco.

Bilie Haonga amesema kuwa wameamua kufanya hivyo ili kuweza kuhakikisha afya za wachezaji wao zinakuwa imara kwa kuepuka magonjwa kama Malaria na Dengue.

Bilie alisema  kuwa wameiepuka Dar kutokana na hali ya hewa ilivyo kwa sasa hivyo kuna uwepo wa asilimia nyingi za kupata Malaria na Dengue kwa kipindi hiki kutokana na Dar kuwepo kwenye Ukanda wa Bahari.

“Tunaenda Tukuyu kwa sababu nyingi, kwanza tunazingatia afya za wachezaji kwa kuwaepusha na magonjwa mengi kama Malaria na Dengue inayosababishwa na hali ya hewa ilivyo kwa sasa hasa ukizingatia Dar ipo kwenye usawa wa Ukanda wa Bahari.

“Lakini kwa sasa hali ya kikosi ni nzuri, kasoro Jonas Mkude  na Himid Mao ambao wanafanyiwa vipimo vya  MRA kutokana na kuumia,” alisema  Bilie.

Kwa upande wa kocha wa Stars, Mholanzi Mart Nooij  alipokuwa akizungumza na Waandishi wa Habari jijini Dar jana alikuwa akiulizwa maswali kuhusiana na maandalizi ya mchezo huo  alitoa majibu ambayo yalishangaza.

 Mfano wa maswali aliyokuwa akiulizwa ni pamoja na, Je amejipanga vipi kuwakabili Msumbiji? Ambapo alisema: “ Kikubwa ninachoomba ni mashabiki wajitokeze kwa uwingi kuhakikisha wanakuja kuisapoti timu, wafike idadi hata ya watu elfu 70.”

Ingawa soka ni mchezo ambao upo tofauti na matokeo, matarajio ya michezo mingine huku akisema kuwa lolote linaweza kutokea katika mchezo huo na kwamba ni sawa na Tenisi katika michuano ya French Open kwamba hata Rafael Nadal ambaye ni mchezaji mkubwa huwa anafungwa na wadogo.

Aliulizwa jingine kuwa, anawazungumziaje Msumbiji ambao alikwenda kuchukua CD ili kuweza kutumia pindi akifundisha wachezaji wake akajibu;

“Nilikwenda Msumbiji kwa sababu niliwahi kuishi kule kwa hiyo nilikwenda kuangalia akaunti yangu ya benki na sio vingine.

Vipi kuhusiana na Kombe la Dunia?; “Siwezi kuanza kuzungumzia masuala ya haya badala ya kuangalia mambo yaliyopo mbele yangu.”

Hata hivyo, Ofisa Habari wa TFF, Boniface Wambura alisema kuwa wachezaji wanaocheza nje wanatarajiwa kuwasili nchini siku tano kabla ya mchezo na wamekwisha watumia taarifa wote watatu ambao ni Mwinyi Kazimoto anayekipiga Al Marikhya ya Quatar pamoja na Mbwana Samatta na Thomas Ulimwengu wanaoichezea TP Mazembe ya DRC.