MASHABIKI SIMBA WACHOMA JEZI YA COUTINHO CHUO KIKUU DAR

Hii ni hatari, utani wa miaka nenda rudi kati ya timu kongwe nchini, Simba na Yanga, umeonekana kugeuka chuki na ukatili, kufuatia kitendo cha mashabiki wa Simba kumvamia shabiki mmoja aliyesadikika kuwa wa Yanga na kumvua jezi kisha kuichoma moto hadharani.

Shabiki huyo ‘aliyekosea’ njia na kuhudhuria mazoezi ya Simba kwenye Uwanja wa Chuo Kikuu cha Dar es Salaam (UDSM), wikiendi iliyopita na kufanyiwa ukatili huo.

Akiwa amevaa jezi namba saba yenye jina la Coutinho ambaye ni kiungo mpya Mbrazil wa Yanga, baadhi ya mashabiki wa Simba waliokuwa wakifuatilia mazoezi ya timu yao, walimvamia, wakamvua jezi hiyo kisha kuichoma moto.

Championi lilishuhudia shabiki wa Simba akitokea akiwa ameshikilia jezi ya rangi ya njano na kijani huku akisaka kiberiti.

Hata hivyo, haikuchukua dakika mbili, mashabiki walianza kupiga kelele, wakitafuta kiberiti, ndani ya dakika, walichukua kiberiti na kuiteketeza na kuitundika mtini huku wakishangilia.

Wakizungumza na SALEHJEMBE kwa nyakati tofauti, mashabiki hao wa Simba, wote kwa kauli moja walikuwa wakipinga kitendo cha jezi ya Yanga kuonekana kwenye mazoezi yao.

“Kwani hapa ni Loyola mpaka aje na jezi ya mkosi? Hapa ni Simba tu, kama vipi aje achukue hela akanunue nguo nyingine lakini si jezi ya Yanga, kama amekosea njia, basi imeshakula kwale,” sauti mbalimbali za mashabiki zilisikika wakati wakitekeleza ‘ukatili’ huo.

Wakati hayo yakiendelea, shabiki mwingine aliyekuwa amevaa jezi kama hiyo, alitimua mbio baada ya kuona kitendo kilichofanyika uwanjani hapo.