CHEKI SARE YA 2-2 YA STARS ILIVYOMTOA CHOZI MAXIMO, AGANDA KWENYE KITI KWA DAKIKA 15

MAXIMO...CHOZI

Unaweza kuona maajabu, lakini ndiyo imetokea kwa kocha wa klabu kujikuta akidondosha chozi baada ya kuona timu ya taifa ikitoka sare.

Kocha wa Yanga, Marcio Maximo, raia wa Brazil, alishindwa kujizuia na kujikuta akidondosha chozi mara tu baada ya mchezo wa kuwania kucheza Kombe la Mataifa Afrika kati ya Taifa Stars na Msumbuji.

WAMEONA WAMUACHE KIDOGO APUMZIKE...

Stori hiyo ya Maximo kuangua kilio imeripotiwa na gazeti la Championi Jumatatu.

Katika pambano hilo lililomalizika kwa sare ya mabao 2-2, Maximo aliyekuwa amekaa eneo la VIP akiwa ameongozana na wakala wake aitwaye Ally na msaidizi wake, Leonaldo Leiva, alishindwa kuinuka akibaki kwenye kiti chake kwa takribani dakika 15.

Wakati mashabiki wameishaondoka uwanjani hapo, Maximo aliendelea kubaki uwanjani akiwa amekaa kwenye kiti na Leiva na Ally walilazimika kumbembeleza na kumuomba waondoke, lakini yeye akamwaga chozi.

BADO HAKIJAELEWEKA..

Muda mwingi Maximo alikuwa akilalama akionyesha kukerwa na Msumbiji kusawazisha bao katika dakika ya 87 na kuufanya mchezo wa marudiano jijini Maputo kuwa mgumu.

Maximo aliwahi kuinoa Taifa Stars kuanzia mwaka 2006 hadi 2010, hali iliyoonyesha alikerwa na sare hiyo na hasa bao la kusawazisha.

MWISHO KAKUBALI WANAONDOKA...

Baada ya wenzake kumbembeleza na kumshindwa, waliamua kumuacha kwa muda huku uwanjani hapo watu wakiwa wameishaondoka.

Muda mchache wa takribani dakika sita au saba waliomuacha atafakari, walirudi tena na kumsihi waondoke uwanjani hapo, ndipo akakubali.

Hiyo ilikuwa ni mara ya kwanza Maximo kukiona kikosi cha Taifa Stars kikicheza tena baada ya miaka minne, tokea alipoondoka.

Maximo ambaye anaendelea kuinoa Yanga kujiandaa na msimu mpya, huenda ni mapenzi yake kwa Stars ndiyo yaliyofanya amwage chozi au mapenzi yake tu na soka la Tanzania au kumbukumbu ya kipigo cha bao 1-0 dhidi ya Msumbiji alichokipata wakati wa ufunguzi wa Uwanja wa Taifa, mfungaji akiwa Manuel Jose Bucuane ‘Tico-tico’.