MAXIMO ATAKA WAKALI WA YANGA WAKAKIPIGE BRAZIL

Kocha Mkuu wa Yanga Mbrazili, Marcio Maximo, kwa ya kwanza ametoa ya moyoni baada ya kutamka kuwa, anataka kuona wachezaji wa timu ya Yanga wanakwenda kucheza soka la kulipwa nchini Brazil.

Kauli hiyo, ameitoa kutokana na baadhi ya watu kuhoji washambuliaji wake raia wa Brazil, Andrey Coutinho na Genilson Santos Santana ‘Jaja’, kutua kuichezea Yanga katika msimu huu wa Ligi Kuu Bara.

Maximo alisema hakuna jambo la ajabu kwa wachezaji hao kucheza soka Tanzania na kuacha kuendelea kukipiga Brazil kunapotambulika kuwepo na wachezaji wenye vipaji.

Maximo alisema, Brazil wapo wachezaji wengi wa Afrika kutoka mataifa mbalimbali yakiwemo Angola na Msumbiji, wanacheza soka kulipwa nchini huko.

Aliongeza kuwa, hakuna kitakachoshindikana katika hilo, hivyo 

amepanga kuyaboresha maisha ya wachezaji kwa kuwaandaa kiprofesheno kwa kupata baadhi ya huduma muhimu kama kambi nzuri ya kisasa, uwanja, gym na bwawa la kuogelea ili siku moja waende kucheza soka la kulipwa Brazil.

“Ujio wa Coutinho na Jaja Tanzania umewashtua watu wengi sana, lakini wanashindwa kutambua kuwa soka ni maslahi, wao wameona yanafaa ndiyo maana wamesaini kuichezea Yanga.

“Klabu za hapa nchini zenyewe zimezoea kusajili wachezaji kutoka Kenya, Uganda na baadhi za nchi Afrika Magharibi kitu ambacho siyo sawa, lazima uchanganye wachezaji kutoka mataifa mbalimbali ili uchanganye mifumo ya uchezaji.

“Wengi wanajua kwamba Brazil hakuna wachezaji wa mataifa mengine kutoka Afrika, kitu ambacho siyo cha kweli, wapo wengi tu wanacheza ligi huko, wapo kutoka Angola na Msumbiji, hivyo ninataka siku moja kuona tunauza wachezaji Brazil,”alisema Maximo.