UHOLANZI VS ARGENTINA, NI VITA YA KINA MASHOTO

Na Saleh Ally

MICHUANO ya Kombe la Dunia inakwenda ukingoni lakini burudani inazidi kunoga na kila mechi inayofuatia inakuwa tamu zaidi, mfano mzuri leo.

Nusu fainali ya pili ya Uholanzi dhidi ya Argentina, ubashiri, kila mtu ana wake hakuna anayejua nani atashinda, lakini gumzo zaidi ni washambuliaji wawili ambao asili yao ni winga.

Winga ni mchezaji anayecheza pembeni lakini timu zao zinawatumia kama washambuliaji, Arjen Robben wa Uholanzi na Lionel Messi wa Argentina na raha zaidi wote wawili, kila mmoja ni hatari zaidi kwa kutumia mguu wake wa kushoto ‘mashoto’.

Robben ambaye alicheza fainali ya Kombe la Dunia mwaka 2010, nchini Afrika Kusini, ndiye mchezaji mwenye kasi zaidi kuliko wengine walio katika michuano hiyo nchini Brazil.

Hiyo haizuii kasi ya Messi ingawa mshambuliaji huyo wa Barcelona, bado hajaonyesha makali kama ilivyotarajiwa zaidi ya kufunga mabao muhimu na pasi moja iliyobadilisha mambo na kuivusha Argentina.

Wachezaji ghali zaidi duniani ni Messi na Cristiano Ronaldo, ambaye amesharudi kwao Ureno. Lakini Robben anaonekana kuwa bora zaidi hata zaidi ya wawili hao na Messi atakuwa na kazi kubwa ya kuwaonyesha wachambuzi wamekosea kutokana na wanavyochambua kwamba Robben ndiye hakamatiki.

Wawili hao ambao wanapiga mashuti makali mguu wa kushoto, ndiyo silaha kubwa wanapokuwa wanamiliki au kukimbia na mpira watakuwa na kazi kubwa leo saa 5 usiku kwa saa za Afrika Mashariki kuionyesha dunia ubora wao.

Kila mmoja ana rekodi zake, huenda mmoja anamzidi mwingine pale, lakini mwisho mechi hiyo ina rekodi zake ambazo zitapatikana baada ya kuwa imekwisha na anayekwenda fainali kujulikana.

Messi:

Unaweza kusisitiza kwamba kikosi cha Argentina hakiko vizuri sana kama ilivyo Uholanzi, lakini soka linabadilika katika kila mechi.

Lakini hata umahiri, Robben ameonyesha ni mshambuliaji tishio zaidi kuliko Messi katika michuano hiyo ya Kombe la Dunia inayoendelea. Messi ana mabao manne, moja zaidi ya Mholanzi huyo.

Mfano utaona kiwango chake cha kupiga mashuti sahihi, kiko chini ukilinganisha na Robben, amepiga mashuti 15, lakini amelenga mara saba tu na kuambulia asilimia 47 za ubora wa kulenga lango.

Messi amecheza dakika 453 na kufanikiwa kutoa pasi moja tu iliyozaa bao. Bado inaonyesha hayuko kwenye kiwango chake sahihi, labda kama atajirekebisha katika mechi ya leo na kuwa msaada zaidi kwa Argentina kuliko ilivyo sasa.

Takwimu: KOMBE LA DUNIA     MECHI      SHINDA       SARE    POTEZA

                   2006, 2010, 2014               12               10                1               1

Robben:

Katika michuano ya Kombe la Dunia mwaka huu, Mholanzi huyo mwenye sifa mbili ‘mbaya’ za lawama, uchoyo na kujiangusha, ameonekana kuwa bora zaidi na ndiye anayeonekana kuwa mchezaji hatari kuliko wote katika michuano hiyo.

Tayari Robben amepachika mabao matatu na kutoa pasi moja iliyozaa bao sawa na Messi, lakini amepiga mashuti tisa katika magoli ya timu pinzani, kati ya hayo, nane yamelenga lango hivyo amepata asilimia 89 za ubora katika hilo.

Katika dakika 480 alizocheza, Robben ameonekana ndiye mshambuliaji msumbufu zaidi kwa mabeki wa timu zilizokutana na Uholanzi na huenda Argentina wakawa katika wakati mgumu kama atakuwa katika kiwango chake.

Takwimu: KOMBE LA DUNIA     MECHI      SHINDA       SARE    POTEZA

                    2006, 2010, 2014               11               9                   1               1