KOCHA OMOG WA AZAM FC ATANGAZA KUITWAA NGAO YA MATUMAINI IJUMAA

Tambo zinaendelea kuelekea pambano kali kati ya Azam na Mtibwa litakalopigwa Agosti 8 katika Tamasha la Usiku wa Matumaini, Uwanja wa Taifa, Dar. Safari hii Kocha Mkuu wa Azam, Joseph Omog, ametamba kwamba atahakikisha wanaisambaratisha Mtibwa siku hiyo.

Azam wameendelea kufanya mazoezi makali chini ya kocha wake huyo raia wa Cameroon ambapo juzi Jumamosi walikuwa kwenye Ufukwe wa Coco jijini Dar, wakisaka pumzi pamoja na stamina.

Omog amesema kikosi chake kinaendelea vizuri na maandalizi ya kuelekea kwenye mchezo huo huku akiwatahadharisha wapinzani wake kuwa wajiandae kukutana na kichapo kizito.

“Tunamshukuru Mungu maandalizi yanakwenda vizuri kwa sababu tunahitaji ushindi katika mchezo huo ambao pia ni sehemu ya kujiandaa na Ligi Kuu Bara na Ligi ya Mabingwa Afrika.

“Mtibwa ni timu yenye wachezaji wazuri lakini sitapenda kuona kikosi changu kinapoteza mchezo huo ambao utakuwa mgumu kutokana na maandalizi jinsi yanavyoendelea kufanyika kwa timu zote mbili.

“Licha ya kuendelea kukipa mazoezi makali kikosi change, leo (juzi) tupo hapa ufukweni kutafuta pumzi na stamina kwa sababu ya kutaka kuendelea kuwa na timu imara yenye ushindani,” alisema Omog, raia wa Cameroon.