MADRID WAJE ILI TUINGIE DARASANI, INGAWA TAYARI KUNA YA KUJIFUNZA

Na Saleh Ally 

KWA mujibu wa waandaaji wa ziara ya Real Madrid nchini, kikosi hicho kitawasili nchini na kucheza mechi yake Agosti 23 dhidi ya nyota wa Tanzania.

Kikosi cha nyota wa Tanzania kitateuliwa ili kupambana na Madrid ambayo italeta kikosi cha wakongwe au magwiji wake ambao wana majina makubwa.

Bado waandaaji hawajaanza kuyaanika majina, lakini kikosi cha wakongwe wa Madrid kinaundwa na nyota kibao, mfano Zinedine Zidane, Luis Figo, Roberto Carlos, Michael Owen, Michel Salgado, Steve McManamann na wengine wengi.

Kunaweza kukawa na maoni tofauti kuhusiana na ujio wa nyota hao ambao itakuwa ni mara yao ya kwanza kuongozana pamoja na kucheza katika ardhi ya Bara la Afrika.

Kikosi cha wakongwe wa Real Madrid kitatoa mafunzo katika mambo mengi sana baada ya kutua na kucheza nchini. Huenda mazuri au mabaya yatajitokeza, vizuri yote yakawa ni sehemu ya shule.

Kikubwa ambacho uchunguzi wa gazeti hili umefanikiwa kupata ni namna ambavyo kikosi cha Real Madrid upande wa wakongwe kimekuwa kikifanya mambo yake katika maisha ya kila siku.

Awali, wakati inaelezwa kuna mpango wa kukileta kikosi hicho, ilionekana ni kama timu ambayo itakusanywa kwa ajili ya safari ya Tanzania na baada ya hapo, kila mmoja anachukua ‘time’ yake.

Lakini mahojiano kati ya Championi na Rayco Garcia aliyekuwa Madrid, Hispania yanaonyesha mambo ni tofauti na Madrid imekuwa ikiwapa nafasi wakongwe wake kuwa na ratiba nzuri ambazo zinaonyesha utofauti mkubwa na mwenendo wa klabu zetu hapa nyumbani.

Katika maisha ya kawaida, wakongwe wengi wa Madrid wamekuwa wakiishi pamoja kwa kuwa kwa wiki, mara mbili wanakutana na kufanya mazoezi kwenye uwanja ambao hutumiwa na timu ya sasa ambayo inaundwa na nyota kama Gareth Bale, Cristiano Ronaldo, Pepe, Sergio Ramos, Iker Casillas na wengine.

Wakongwe hao si wote wanaoishi Madrid, lakini wapo ambao wamekuwa wakisafiri kutoka miji au nchi jirani kuungana na wenzao angalau mara moja kwa wiki na kufanya mazoezi pamoja.

Kikosi chao kimekuwa kikisafiri pamoja na kwenda kucheza na vikosi vya wakongwe wengine kama Manchester United, Arsenal, Liverpool, Inter, AC Milan na vingine barani Ulaya.

Kwa mujibu wa Rayco, kikosi cha wakongwe wa Madrid ambacho kimekuwa kikicheza mechi za ushindani kitakuwa tayari kucheza na timu yenye nyota hata wale wa Taifa Stars kwa kuwa kiko fiti.

“Unapofikia wakati kuna mechi, siku za mazoezi zinaongezeka na benchi la ufundi la Madrid limekuwa likijumuika na kikosi hicho kwa ajili ya mazoezi zaidi ili kuwafanya wawe fiti kwa ajili ya mchezo unaofuata.

“Ni mechi ya kwanza Madrid kucheza barani Afrika kwa kikosi hiki cha wakongwe. Hakuna atakayefanya mzaha na tutashughulikia vizuri sana,” anasema Rayco ambaye ni kati ya wachezaji wa kikosi hicho.

Rayco pia amewahi kucheza timu ya vijana ya Barcelona kabla ya kurejea Madrid ambako sasa anakipiga kwenye timu hiyo ya wakongwe na anasisitiza mashabiki wa Tanzania watashangazwa tofauti na wengi wanavyoamini kwamba ni wakongwe, hivyo hawataweza kucheza.

Achana na yote, lakini hata kabla Madrid haijafika nchini, tayari funzo limejitokeza. Kwamba wakongwe wa Yanga na Simba ambao wengi wanaendelea kuwa hazina ya soka hapa nyumbani, wangeweza kuendelea kuwa pamoja kwa kushirikiana.

Suala hili linaweza kuanzishwa na klabu hizi mbili kongwe, zikawaandalia utaratibu mzuri, zikawatafutia angalau udhamini mdogo ambao ungewasaidia kujiendesha na wao wakaendelea kuwa karibu na klabu.

Inawezekana wao kuendelea kuwa karibu na klabu na wakawa msaada. Lakini kuwa pamoja lazima watazalisha mambo yanayoweza kuwa msaada kwenye soka katika klabu hizo na nyumbani.

Kikubwa kama hilo litawezekana, wachezaji hao wafuate utaratibu, wafanye mambo yao kwa kuangalia mafanikio au kujenga na si majungu. Acha Madrid ije, kutakuwa na mengi ya kujifunza.