USAJILI WA SIMBA, YANGA ZAIDI YA SH MILIONI 400, KAMBI ZAO, AAH! MUNGU ANAJUA

YANGA wamefunga usajili kwa ajili ya msimu ujao wa Ligi Kuu Bara, watani wao Simba watakuwa bado wanahangaika katika nafasi moja, nao watafunga.

Simba wanajaribu kuangalia kati ya mshambuliaji Modo Kiongera kutoka Kenya na yule Jerome Ramatlhakwane kutoka Botswana ambaye anakipiga TP Mazembe ambayo imemtoa kwa mkopo kwa Don Bosco pia ya DR Congo.

TP Mazembe inaonekana ipo tayari kumtoa Ramatlhakwane kwa Simba, lakini mazungumzo hayajakamilika. Simba watakapomalizana na hilo, hakuna shaka nao watafunga usajili na baada ya hapo ni kambi.

Kambi kwa timu zote zimeanza, wataalamu wanaziita off camp. Wachezaji wanakwenda uwanjani na kufanya mazoezi, baada ya hapo kila mmoja anarejea nyumbani kwake.  Hakuna ubishi baada ya hapo, Yanga, Simba watabadilisha mfumo na kuanza kambi ya wachezaji kuishi pamoja.

Ukitaka kufanya tathmini ya usajili, angalau Sh milioni 200 au zaidi kutoka kila upande zitakuwa zimetumika. Maana yake kwa msimu huu pekee, Yanga na Simba zitakuwa zimetumia zaidi ya Sh milioni 400 kwa ajili ya usajili tu.

Kwa wachezaji iliyowasajili na makocha wawili kutoka Brazil, hapana shaka Yanga wanaweza wakawa wametumia fedha nyingi zaidi. Pengine milioni 300 au zaidi ya hapo. Hayo yote yanaweza yakawa yamepita.

Sasa kinachofuatia ni maandalizi ambayo yatatoa majibu ya kile walichotoa, fedha walizomwaga kufanya usajili. Lazima kuwe na kambi za uhakika ambazo zinaendana na mfumo wa kisasa.

Kwa Azam FC, wao hilo linaweza lisiwe tatizo. Wana kambi nzuri na kila kitu kinapatikana kwa ajili ya maandalizi na huenda makocha au wachezaji wao wanaweza wasiwe na sababu kuhusiana na mazingira mazuri.

Wale wa Yanga na Simba, vipi? Uongozi wa klabu hizo kongwe unalitambua hilo, kwamba umepoteza fedha nyingi kwa ajili ya usajili kama utajumlisha ada ya usajili, kuwalipa wachezaji na mishahara minono itakayokuwa inamwagwa kila mwezi, bila ya kusahau posho?

Kambi wanazozitegemea zitakuwa ni za kukodi kwa kuwa hawana sehemu au vifaa kama ilivyo kwa Azam FC. Ndiyo maana siku chache zilizopita nikaandika makala na kuelezea kuhusiana na “soka la kutembeza”.

Niwakumbushe, usajili mzuri au wa majina pekee bila ya maandalizi bora itakuwa ni kazi bure. Mwisho wake hata akina Jaja, Coutinho na wengine waliosajiliwa Simba hawatakuwa na lolote.

Kuna taarifa Yanga watakwenda kujichimbia Pemba na maandalizi yako katika hatua za mwisho, Simba pia wana mpango wa kwenda Afrika Kusini kwa kambi ya siku takribani kumi. Ni jambo zuri, lakini kuna jambo pia nitakumbusha.

Timu kusafiri na kwenda kuweka kambi nje ya Dar es Salaam, mara nyingi limekuwa likitumika kama jambo la uhamasishaji na si ufundi. Uongozi unaamini kuwa kama timu itakuwa nje ya Mkoa wa Dar, basi mashabiki na wanachama au wachezaji wenyewe watahamasika na kujituma.

Lakini wakati mwingine hata kambi hizo za mikoani au nje ya Tanzania zimekuwa zikijaa kasoro kibao na wachezaji badala ya kujituma baada ya kuhamasika, wanatumia muda mwingi kulaumu kutokana na kuwepo kwa kasoro lukuki.

Hivyo ni jambo jema, uongozi wa Simba na Yanga ukazipima kambi hizo kwa kuangalia uhakika. Kwamba kama kweli zimelazimika kupeleka vikosi vyao nje, basi iwe kwa sababu hasa za msingi na kambi zina ubora sahihi.

Mwisho ni katika suala la mechi za kirafiki ambazo Simba na Yanga zitacheza wakati wa kujiandaa. Lazima ziwe ni zile kwa ajili ya kujenga kikosi na kumpa nafasi kocha kukitathmini kikosi chake na si ilimradi kwa kuwa viongozi ndiyo wameamua na hakuna la kufanya. Msipokuwa makini, mwisho mtaishia kuwa gumzo wakati wa usajili, mwisho wanaobeba ubingwa wanakuwa wengine.