PIGA KAZI UONE NOTI ZINAVYOMWAGIKA ENGLAND

Wakati sasa ikiwa siyo siri tena juu ya wachezaji wanaocheza soka kwenye Ligi Kuu ya Italia (Seria A) kulipwa pesa kiduchu, hali ni tofauti nchini England.

England wachezaji wamekuwa wakilipwa kutokana na uwezo wao, lakini kwa Italia hali ni tete na ndiyo sababu kubwa mastaa wengi wanapakimbia kila kukicha.

Kutokana na hali hiyo, tuangalie wachezaji 10 kutoka England ambao wamekuwa wakivuta mkwanja mrefu msimu huu 2014/15.

10. John Terry

Nahodha wa Chelsea, John Terry, anakamata namba 10 kwenye listi hii kutokana na kuingiza pauni 175,000 (sawa na Sh milioni 317 za Kitanzania) kwa wiki.

Ameitumikia klabu yake hiyo katika michezo 424 ikijumuisha michuano mbalimbali, huku katika kikosi cha Three Lions (England) akivaa jezi ya nchi hiyo mara 78.

Nahodha huyo wa Blues anashikilia tuzo tatu za kuwa beki bora wa mwaka wa EPL, vilevile ana Tuzo ya Mchezaji Bora wa Mwaka wa ligi hiyo.

9. Mesut Özil

Mshika Bunduki huyu ambaye ameshinda Kombe la Dunia 2014, ameingia katika orodha hii kwa kushika namba tisa kutokana na kuingiza pauni 180,000 (sawa na Sh milioni 480 za Kitanzania) kwa wiki.

Özil ambaye alitua kikosini hapo mwanzoni mwa msimu uliopita, pia ameweka rekodi ya uhamisho baada ya kutua kwa uhamisho wa pauni 42.5 akitokea Madrid.

Japokuwa ameshindwa kufanya kama vile ilivyotarajiwa na wengi, lakini huyu atabaki kuwa mmoja kati ya viungo makini kwa sasa.

8. Eden Hazard

Kijana huyu mzaliwa wa Ubelgiji, ameshika namba hii baada ya kuwa akikusanya pauni 185,000 (sawa na Sh milioni 499 za Kibongo) kwa wiki.

Kiungo huyu aliyekuzwa na Klabu ya Lille ya Ufaransa, ameaminiwa na Chelsea mpaka kupewa jezi namba 10 ambayo ilitumiwa na magwiji kadhaa wa timu hiyo.

Kocha wake Jose Mourinho amemtabiria kinda huyo kuwa atakuja kuwa mkali wa dunia kwa siku za baadaye.

7. Cesc Fabregas

Pasi zake murua ndizo zimemfanya arejeshwe tena katika Jiji la London na timu ya Chelsea ambapo sasa anavuna pauni 200,000 (sawa na Sh milioni 540 za madafu).

Mchezaji huyo ambaye ni zao la akademi ya Barcelona, La Masia, alitua jijini humo na katika umri wa 21 tu, akakabidhiwa unahodha wa timu ya Arsenal.

Aliondoka klabuni hapo kwa shinikizo la kurudi kwao ambapo licha ya kukaa kwa misimu kadhaa, hakuweza kung’aa kama mwanzo, lakini kwa sasa swali lililopo ni kuwa, ataweza kupata mafanikio na timu yake mpya ya Chelsea?

6. Sergio Aguero

Straika wa Manchester City, Sergio Aguero, amekamata namba sita kutokana na kulipwa kiasi cha pauni 225,000 (Sh milioni 607 za Kitanzania).

Alipokuwa katika kikosi cha Atletico Madrid, Agüero alitupia wavuni mara 74 katika michezo 175 kabla ya kutua City kwa pauni milioni 38, sehemu ambayo amezidi kupata mafanikio na kushinda ubingwa mara mbili.

Anakumbukwa kwa bao lake maridadi dhidi ya QPR katika mchezo waliochukua ubingwa baada ya miaka 47 kupita, misimu miwili iliyopita.

5. Robin van Persie

Kipaji chake kilianzia Feyenoord, pia ndiye nahodha wa Uholanzi. Van Persie anaingiza kiasi cha pauni 225,000 kwa wiki ambacho kinafanana na kile anachopata Sergio Aguero.

Straika huyo ilifikia wakati alikuwa roho ya Arsenal kabla ya uhamisho wake kwenda Man United.

Sababu kubwa ya uhamisho huo ni kukimbia ukame wa vikombe katika timu hiyo yenye maskani yake Kaskazini mwa London, hata hivyo anabaki kama mmoja wa washambuliaji hatari duniani.

4. Yaya Toure

Huyu ndiye Mwafrika pekee katika listi hii ambaye uwepo wake Man City unamfanya achukue pauni 240,000 (sawa na Sh milioni 648).

Yaya ni mchezaji mwenye uzoefu mkubwa katika soka la Ulaya, alishacheza kwa mafanikio Barcelona, pia ameshacheza mara tatu michuano ya Kombe la Dunia akiwa na kikosi cha Ivory Coast.

Kipaji chake cha kufunga, kupiga mipira ya faulo na kukaba ndicho kinamfanya kuwa mmoja wa viungo hatari Premier League.

3. Radamel Falcao

Hapa kulikuwa na utata kidogo lakini ni rasmi kuwa Falcao atakuwa akiingiza kiasi cha pauni 265,000 (sawa na Sh milioni 715) kwa wiki.

Amesajiliwa kwa mkopo wa msimu mzima katika dakika za lala salama na Manchester United kutoka AS Moncao, Falcao ni mmoja kati ya wachezaji muhimu waliosajiliwa United.

Rekodi zake zinambeba baada ya kufanya vyema huko nyuma na timu za Porto ya Ureno na Atletico Madrid ya Hispania.

2. Angel Di Maria

Huyu anakamata namba mbili baada ya kutua kwa Mashetani Wekundu wa Manchester msimu huu, mchezaji huyo anaikamua klabu hiyo kiasi cha pauni 280,000 (sawa na Sh milioni 756) kwa wiki.

Hakuna anayeweza kupinga Di Maria kulipwa kiasi hicho kutokana na uwezo wake madhubuti wa kucheza soka ambapo aling’aa mno msimu uliopita akiwa na kikosi cha Galaticos, Real Madrid.

Alishinda ubingwa wa La Liga na Ligi ya Mabingwa. Ameshacheza zaidi ya michezo 100 katika kikosi cha Madrid, ndiyo maana United wakakubali kutoa kiasi cha pauni milioni 59.7 kama ada ya uhamisho wake.

1. Wayne Rooney

Nahodha wa England na Manchester United, Wayne Rooney ndiye mchezaji anayelipwa zaidi Premier League, kwa wiki anaingiza mfukoni pauni 300,000 (sawa na Sh milioni 810).

Amecheza mara 100 kwa kikosi cha England na amefanikiwa kufunga mabao 41 kwa nchi yake na amecheza mara 300 kwa United na kufunga 159.

Rooney ni kati ya wachezaji ambao wameweka historia kwenye Premier League kutokana na kufunga bao bora la muda wote wakati alipokuwa Everton walipocheza na Arsenal, ambalo mpaka kesho wakali hao wa Jiji wa London hawawezi kulisahau.

Rooney ameshashinda ubingwa wa ligi, Ligi ya Mabingwa na Mchezaji Bora wa Mwaka.