BAADA YA IVO KUVUNJIKA KIDOLE, CASILLAS AKABIDHIWA MIKOBA

Kipa Hussein Sharrif  maarufu kama Casillas sasa ndiye atadaka katika mechi ya watani wao Yanga itakayopigwa Oktoba 12.

Hiyo inatokana na kuvunjika kidole kwa kipa namba moja wa Simba, Ivo Mapunda, leo mazoezini.

Daktari wa Simba, Yassin Gembe amethibitisha kuwa Ivo amevunjika kidole na atatakiwa kukaa nje kwa wiki nne.

Kutokana na kuvunjika kwa Ivo, Simba imeanza kumuandaa Casillas kisaikolojia kwamba yeye ndiye anapaswa kuchukua mikoaba ya Ivo kuanzia mechi ya Jumamosi dhidi ya Polisi Moro.

“Kweli tumeanza kuzungumza na Casillas na kumueleza kuhusiana na majukumu muhimu yaliyo mbele yake.

“Yeye ndiye anakuwa namba moja na atanakiwa kuwa makini na kutekeleza majukumu yake.

“Kuumia kwa Ivo ni ajali kazini, lakini bado tunaamini yeye ana uwezo mkubwa wa kuisaidia timu kuanzia mechi ya Jumamosi, ile ya Stand, Yanga na kuendelea.

“Kikubwa Simba inataka kushinda sasa baada ya kuanza kwa sare, tunajua tunajitaji pointi tatu muhimu,” kilieleza chanzo kutoka ndani ya Simba.

Simba imekuwa ikiandamwa na majeruhi mfululizo baada ya kuumia kwa Paul Kiongera, Haruna Chanongo na Issa Rashid ‘Baba Ubaya.