HOJA YANGU….SIMU ZA WACHEZAJI WA MAN UNITED, VAN GAAL NA SOKA YETU YA BONGO

SIKU mbili zilizopita, Kocha Mkuu wa Manchester United, Louis van Gaal aliamua kufanya kitu ambacho huenda kimewashtua watu wengi sana, lakini unaweza ukawa ni msimu wa kuinuka kwa kikosi hicho.

Manchester United imefanya usajili mzuri hadi dirisha linafungwa, imeibua idadi ya washambuliaji na viungo bora kama Angel di Maria na Radamel Falcao ambao hakuna shaka watatoa msaada mkubwa.

Bado pamoja na hayo, Kocha van Gaal ametangaza amri mpya ambayo haikuwahi kufanyika hapo awali. Kwamba kila siku moja kabla ya mechi, wachezaji watakabidhisha simu zao zote kwa uongozi.

Hiyo itakuwa ikifanyika usiku wa kuamkia kwenye mechi! mastaa wote watalazimika kukabidhisha simu zao kwa uongozi na kingine amesisitiza chakula cha mchana ambacho wamekuwa wakila saa 7 mchana, kitajumuisha timu yote, yaani timu kubwa na zile za vijana, full stop!

Inawezekana katika hali ya kawaida, mtu anaweza kufikiria kwamba jambo hilo lingependeza zaidi kufanyika katika vikosi vya timu za Tanzania ambako wengi wamekuwa wakililia uhuru kama wa Ulaya.

Wachezaji wa Tanzania hawapendi kubanwa wakiamini Ulaya hawabanwi na bado wanafanya vizuri. Wanaamini ni watu wazima na kubanwa kunawafanya wasiwe huru badala yake wanataka wapewe uhuru kwa kuwa wanayajua majukumu yao.

Makocha kadhaa hasa wale kutoka Ulaya wamekuwa wakikwama Tanzania kutokana na kuwaacha wachezaji wawe huru kabisa na mwisho wanawaangusha wao kwa kuwa wanautumia vibaya uhuru wanaopewa.

Mara ngapi tumewalaumu makocha wanaowawapa wachezaji uhuru kupindukia, kweli wanakuwa na nia nzuri lakini wachezaji ndiyo wanashindwa kuwa waelewa kutokana na wanachopewa. Timu ikianguka, anayepewa lawama zote, inakuwa ni kocha.

Wachezaji walio Manchester United hauwezi kusema hawajui suala la kuwa ‘professional’, lakini van Gaal pia hawezi kuwa mwendawazimu, maana yake ameona jambo na anataka mabadiliko ndiyo maana ameamua kutikisa.

Alichokifanya huenda kisiwe cha kudumu, lakini ametuma salamu kwa wachezaji kwamba yeye ndiye ‘mwenye nchi’ na ameamua kufanya hivyo akitaka kila mmoja wao kuweka akili na nguvu zake kwenye kila mchezo ulio mbele yake.

Maana yake hivi, van Gaal anataka Manchester United ianze kushinda na si hadithi kama ambavyo mambo yamekuwa yakitokea. Anajua presha kubwa iko mbele yake kwa kuwa Man United ndiyo iliyofanya usajili ghali zaidi kuliko klabu nyingine yoyote msimu huu.

Pia imempata kila iliyemtaka kuanzia katika beki, kiungo hadi washambuliaji. Hivyo van Gaal hawezi kuwa na lolote la kujitetea zaidi ya kuwaridhisha mabosi wake wa Manchester United na ushindi.

Uwezo wa wachezaji alionao hauna maswali, ni bora na unakubalika duniani kote. Kwa nini ushindi ni tatizo? Ndiyo ameona suala la kuweka nguvu na akili nyingi kwenye mchezo zimepungua na inawezekana ameona ushiriki wa wachezaji wake kwenye mitandao ya kijamii kama Twitter, Facebook na Instagram unavyokuwa juu licha ya wao kutofanya vizuri.

Uamuzi wa ujasiri wa van Gaal unatufunza kwamba kocha anaweza kuwa na mbinu nyingi za ushindi na kocha huyo Mholanzi anataka kuwaonyesha wachezaji yeye ndiye bosi, mwenye uwezo wa kuongoza mapambano ya timu kupata ushindi, hivyo hakuna mjadala kwenye kumsikiliza.

Maana yake hivi, itakapotokea mwalimu anapambana na wachezaji wasio na nidhamu, si kwa lengo binafsi na badala yake ili kukisaidia kikosi chake, viongozi wanapaswa kuungana naye.

Hapa nyumbani imekuwa tofauti kidogo na kunapotokea kocha anapanga mikakati fulani ambayo inawaudhi wachezaji, viongozi hutengana na wengine wakawaunga mkono wachezaji kwa kuwa ni washkaji au vipenzi vyao bila ya kujali maslahi ya timu na klabu.

Van Gaal ametoka Ulaya na kurudi Afrika, kwamba kumbe bado tabia za wachezaji hazipishani sana na ikiwezekana wakati mwingine wanapaswa kuchungwa. Angalia, Ulaya nao wanachungwa, vipi nyumbani kwetu!