KITAALAMU, GIROUD ANAMZIDI WELBECK, LAKINI BADO ANA NAFASI ZAIDI...

Na Saleh Ally

PAMOJA na Manchester United kufanya usajili ghali zaidi kwenye Ligi Kuu England ikiwemo kumsajili mshambuliaji nyota Ramadel Falcao, bado gumzo kubwa la usajili limeangukia kwa Danny Welbeck.

Welbeck, 23, ametua Arsenal akitokea Manchester United kwa uhamisho wa pauni milioni 16 na ndiye anaonekana kujadiliwa zaidi.

England kunaweza kuwa mbali zaidi, mashabiki wa soka hapa nyumbani Tanzania wamekuwa wakijadili kama kweli Welbeck anastahili kucheza Arsenal.

Wako wanaoona kama Wenger hakuwa na sababu ya kumtwaa kwa kuwa kuna Olivier Giroud na Yaya Sanogo.

Hata hivyo kwa Wenger, Giroud ndiye atakuwa mshindani mkubwa wa Welbeck, lakini sasa ni majeruhi.

Kama wote wakiwa fiti, unaweza kujiuliza Wenger atakuwa katika nafasi ipi na yupi hasa atampa nafasi ya kuanza.

Usisahau, wakati Giroud anaumia na kulazimika kukaa nje hadi mwakani, aliipa Arsenal bonge la bao la kusawazisha dhidi ya Everton.

Pamoja na yote kila mmoja ana aina ya uchezaji wake, kiasi Giroud ni mgumu anayeweza kucheza kama mshambuliaji wa kati tu, lakini Welbeck kidogo atakimbia na mpira kama kiungo, ingawa hatatakiwa kufanya hivyo sana kwa kuwa Arsenal ina watu kama Santi Cazorla, Theo Walcott, Alex Oxlade-Chamberlain, Alexis Sanchez na Mesut Ozil.

Takwimu zao zilizopita, zinaweza kuchangia Wenger aamue nini, ingawa ufanisi wao kila watakapopewa nafasi linaweza kuwa jibu sahihi,

Mechi & mabao:

Tokea alipotua England akitokea Montpellier ya Ufaransa, msimu wake wa kwanza Giroud alipiga mabao 11 katika mechi 34. Msimu uliofuatia akaongeza kwa kupiga 16 katika mechi 36.

Maana yake mabao yake 27 katika dakika 5,477 alizoichezea Arsenal ni wastani wa bao moja katika kila dakika 195.6.

Rekodi ya Welbeck ni mechi chache na dakika chache zaidi, kwa kuwa misimu miwili amecheza mechi 54, aikiwa ameanza kwa asilimia 50 ya mechi hizo na amefunga mabao 10.

Amefanikiwa kucheza jumla ya dakika 2,791 ukiwa ni wastani wa dakika 279.1 kwa bao.

GIROUD                                       WELBECK

Mechi 72 mabao 28                     Mechi 54 mabao10

MASHUTI:

Kwa umaliziaji, wote si wabaya sana ingawa si wa kiwango cha juu hadi kuwaita hatari.

Katika suala la kupiga mashuti na kulenga lango, kwa misimu miwili iliyopita, Welbeck akiwa na Man United amepiga mashuti 60 yaliyolenga lango, huku akiwa nafasi chache ya kucheza kwa kuwa kuna Wayne Rooney na Robin van Persie.

Giroud aliyekuwa na nafasi ya kutosha kucheza, amepiga mashuti 182 ambayo ni mara tatu ya Welbeck

Ukiweka wastani wa mechi alizocheza kila mmoja na mashuti aliyopiga, inaonekana Welbeck ana ubora zaidi kwa kuwa wastani wake ni 16.7, wakati Giroud ana 15.4.

NAFASI:

Giroud ni mkali zaidi katika utengenezaji wa nafasi, akiwa na Arsenal ametengeneza nafasi 72 kwa wachezaji wengine wa Arsenal na 11 kati ya hizo zimezaa mabao.

Welbeck ametengeza pasi 36 ambazo ni nusu ya Giroud na kusababisha mabao matano.

Kwa umri wake na mechi alizocheza, Welbeck ana nafasi ya kufanya vizuri Arsenal hasa kulingana na aina ya uchezaji wao.

Safari hii hatalazimika kukimbia zaidi na mpira, badala yake kutafuta nafasi tu ili afunge kwa kuwa mafundi wamejazana, mfano Ozil, Cazorla na wafanya ‘fujo’ kama Chamberlain na Sanchez.

Wakati Giroud anasubiri hadi mwakani kurejea dimbani, hii ni nafasi kwake kwamba anaweza na Mfaransa akirejea dimbani, aanze kazi ya kusaka namba.

SOURCE: CHAMPIONI