KUNA KITU JIFUNZE, COSTA MECHI 4, MABAO SABA

Na Saleh Ally

MAFANIKIO ya mshambuliaji mpya wa Chelsea, Diego Costa yanaonekana kwenda haraka sana kwa kasi ya kimondo.

Costa, raia wa Hispania, tayari amefanikiwa kufunga mabao saba katika mechi nne tu alizocheza za Ligi Kuu England.

Wakati anaondoka Atletico Madrid kwenda kujiunga na Chelsea, wengi waliamini hawezi kutamba kwa kuwa alikuwa anatokea kwenye ligi laini.

Ilionekana La Liga ambako aliwatoa jasho Cristian Ronaldo wa Real Madrid na Lionel Messi wa Barcelona ni laini si kama England.

Lakini sasa tayari kawashitua wengi, mechi nne bao saba tena England. Maswali yanaanza kuibuka na moja ni kweli uwezo huo utaendelea au ni nguvu ya soda?

Maswali yanaweza kuwa mengi lakini majibu yake yanataka subira kwa kuwa yatajibiwa na mechi zinavyoendelea.

Hakuna suala la utabiri wala ubashiri lakini kila mechi inapochezwa, majibu yatapatikana.

Kizuri ambacho kinaonyesha moto wa Costa hauwezi kuzimika kirahisi ni mambo matatu makubwa.

Ufundi mwilini:

Mabao saba aliyofunga, yanaonyesha kuwa Costa ni mjuzi na si rahisi kupunguza kazi kwa kuwa amepata jumla ya nafasi 12, kati ya hizo amefunga saba.

Huo ni wastani wa zaidi ya asilimia 73 ya matumizi bora ya nafasi, maana yake ni mshambuliaji hatari zaidi kuliko wote hadi sasa katika Premier League.

Kushusha wastani kama atapata nafasi nyingi halafu akazipoteza, lakini hadi sasa, hakuna mjadala.

Silaha tatu:

Lakini bado inaonyesha ni mchezaji bora sana kwa kuwa tayari ametumia silaha zote tatu kufunga mabao hayo saba.

Mshambuliaji yeyote hatari, lazima atakuwa na silaha tatu hatari na inategemea, kama ataweza kuzitumia zote, basi atakuwa ni tishio.

Mguu wa kulia, wa kushoto na kichwa. Costa anaonyesha za kwake zote zimefanyiwa ‘service’ ya uhakika na ziko safi kufanya kazi kwa kuwa zote zimeishatumika katika hayo mabao saba.

Kukamilika:

Hakuna ubishi kweli Chelsea imekamilika vilivyo kwenye kila idara, ukianza mabeki, viungo na washambuliaji. Suala la kipa, halina ubishi wanao wa uhakika.

Ukizungumzia wachezeshaji kwa maana ya viungo, Chelsea wako sawa sana na wanajumuisha vijana wengi na wakongwe watundu.

Uhakika unapokuwa na mtu kama Cesc Fabragas ambaye anacheza timu ya taifa na Costa, lakini Eden Hazard, Oscar na Nemanja Matic, wote ni wale wanaoweza kutengeneza kitu kwa uwezo binafsi na si maelekezo ya kocha pekee.

Yote haya yakiwa kwenye kiwango cha juu, yataendelea kumfanya Costa afanye kazi yake vizuri ambayo itakuwa ni kucheka tu na nyavu.

Ataendelea au la, vyote vifanye kazi kwa pamoja na kuomba majeraha yasimkute lakini kikubwa cha kujiuliza, mabeki ‘wakatili’ wa England, watakubali kirahisi?

Aina ya Costa ni watu wasiokubali kushindwa kwa kujitahidi kila kukicha na hilo ndiyo linambeba.

Mabao yake pia yameonyesha kuwa ni hatari zaidi kwa mabeki wa England kwa kuwa amefunga kwa kupiga chenga, kuunganisha, kufunga mbele ya mabeki pia kwa shuti kali. Vyote ameweza.

Mwisho usisahau, kama ataendelea kufunga ndani ya mechi kumi zijazo, huenda ikawa ndiyo tiketi ya Mhispania mwenzake, Fernando Torres kupigwa bei kabisa kwa kuwa sasa anacheza AC Milan kwa mkopo.